Куьздинъ куьнъирт куьнлерининъ келуьви мен аьдемлердинъ ден савлыкларына да зыян келетаган ерлер коьп болады. Зыян дегенимиз, аьдемлер арасында грипп авырувы ман авырымага амырак боладылар. Сол оьткир вируслы авырувдан сакланув – вакцинация. Авырув кенъ яйылган шакта сол энъ де маьнели коршалавшы болады.

Ызгы йылларда грипп авырувына карсы прививкалар эттиретаганлар саны оьсе береди, сол себептен авырыйтаганлар саны да тоьменлене береди.

Грипп маразы ман авырыганлардынъ, бу авырувдан ийги болганнан сонъ да, баска муьшелерине зыян келтириледи. Грипп негизинде юрек-тамыр, тыныс алув муьшелери де авырымага болады. ВОЗ-дынъ маслагаты ман 60 ясларыннан оьткен аьдемлерге, медицина, билимлендируьв, социаллык тармакларында куллык этетаган аьдемлерге, окувшыларга, савда юритетаган тармаклардынъ куллыкшыларына вакцинация боьтен де керек зат болады. Солай ок, 6 айдан 7 ясына дейим балаларга да вакцинация этилинмеге керек. Уьш ясына толмаган балаларга эки боьлинип, шаркы авыр хатынларга алты айга дейим прививка этилинеди.

Гриппке карсы прививка кайсы яста да аьдемнинъ ден савлыгына зарарлы тувыл, тек янъы этилген шакта бас авырымага, коьп болмаса да, эт кызув коьтерилмеге, ийне урылган ери кызармага болады. Бу затлар эки куьннен сонъ таядылар.

Вакцинация этилмеге ярамайтаган аьдемлер де бар: аллергиялары болганлар, байыр авырувлары барлар эм вакцинация этилинетаган шакта эт кызувы тийислиден артык болганлар. Баскалай, вакцинация, аьлиги кыйынлы заманларда, ден савлыкты коршалавда, маьнели болады. Эсинъизде болсын, сизинъ савлыгынъыз – оьз колынъызда!

А.Нургушиева,
врач-эпидемиолог.