Янъыларда, Дагестан Республикасынынъ Халк Йыйынынынъ экинши окувларында, депутатлар ман 2023 эм 2024-2025-нши йылларга планлы Дагестан Республикасынынъ бюджетининъ проекти кабыл этилинип алынган.

Проект пен Дагестан Республикасынынъ Халк Йыйынынынъ бюджет, финанслар эм налоглар бойынша председатели, республикадынъ Финанслар министри Юнус Саадуев таныстырды. Онынъ билдируьвине коьре, 2023-нши йылда, бюджетке коьре, 192,8 млрд. маьнет акша шыктажланмага болады, келеек акша оьлшеми – 177,2 млрд. маьнет акша. Сога коьре, республика бюджетинде 15,6 млрд. маьнет акша етиспейтаганы коьрсетиледи.
Дагестан Республикасынынъ бюджет проектин кабыл этуьвге тавысын 71 депутат берди, экеви бермей калды.
Кабыл этилинип алынган законопроект бойынша парламент спикери Заур Аскендеров оьз ойын да билдирип кетти.
– Кайдай кыйынлыклар болса да, республикамыз бойынша баьри социаллык борышлар да толтырылаяк эм педагогикалык исининъ куллыкшыларынынъ кыйын аклары да оьсеек, сол ниет пен фондтынъ оьлшеми 1,2 млрд маьнет акшага оьскен, – деди ол.
Онынъ соьзине коьре, мектеблерде де, балаларды исси ас пан канагатлав яктан да ийги туьрленислер болаяк.