Уьш куьн узагында, 5-7-нши курал айынынъ куьнлеринде, Ногай районы еринде республикалык «Енъуьв байрагы» акциясы эсабында эм Уллы Енъуьвдинъ 77-нши йыллыгы ман байланыста автомобиль ювырысы болып оьтти.
Авыл яшавшылары Енъуьв байрагынынъ копиясын, Россия эм Дагестаннынъ патшалык байракларын коьргенде, оьз куванышларын ясырмай, бу эстеликли марафоннынъ ортакшыларын хош коьрип йолыктылар. Аьр бир авылдынъ сыйлы еринде орынласкан согыстан кайтпаган ердеслердинъ эстеликлерине шешекейлер салынып, эстеликли митинглер оьткерилди. Соларда белгиленген авыллардынъ аькимбаслары, автоювырыстынъ катнасувшылары: Ногай район аькимбасынынъ орынбасары Баймагомед Ярлыкапов, район Савытлы куьшлер эм ыхтыяр саклавшы органлар Ветеранлар советининъ председатели Акманбет Сангишиев, район Ямагат палатасынынъ председатели Эльмурза Саитов, Ногай эм Тарумов районларынынъ военкомы, майор Александр Мельников, район Хатын-кызлар советининъ председатели Асият Манкаева, район Афганистан согысынынъ Ветеранлар советининъ председатели Сталинбек Култаев, Чернобыльшилер союзынынъ район боьлигининъ председатели Руслан Кунтувганов, Афганистан согысынынъ ортакшысы Мурат Мамутов, кавга ветеранынынъ увылы, КПРФ Ногай РК ваькили Тахир Аракчиев эм баскалар оьз ойларын эм йоравларын айттылар.
– Автомобиль ювырысынынъ бас ниети – ол узактагы 1945-нши йылда оьзининъ уллы йигитлиги эм кайратлы иси мен фашизмди енъген эм согыстан сонъ бузылган район хозяйствосын аякка тургызган ердеслердинъ акында мутылмас эстелик. Олардынъ баьрининъ атлары да Терекли-Мектебтинъ ортасындагы эстелик мемориалында оьмирге язылып салынган.
Автоювырыстынъ тагы бир ниети – ол элимиздинъ Савытлы куьшлери Украина еринде бас коьтерген нацистлерге карсы юритилип турган спецоперацияды колтыклав.
Тувган Элимиздинъ эркинлигин авыр согыс йылларында коршалаганлар акында эстеликти оьмирлерге саклайык. Балалар халкымыздынъ уллы баьтирлигине тийисли болып оьссинлер, – деп белгиледи оьз соьзинде Баймагомед Ярлыкапов.
Военком Александр Мельников оьзининъ шыгып соьйлевлеринде бизим ветеранлар биз олардынъ акында эстеликти саклап турганша, олар да сол шаклы заман халк эсинде яшаяк деди.
Эльмурза Саитов район яшавшыларына тынышлыкты эм буьгуьнлерде Украинадагы россия аьскершилери аман-эсен тувган ерине кайтсынлар деп йорады.
Асият Манкаева мундай шаралар энъ де бас деп бизим ясларды тербиялав уьшин керек деп белгиледи. «Патриотизм болмаса, бизде оьзге бир зат та болмаяк», – деп билдирди ол.
Оьзлерининъ шыгып соьйлевлеринде район яшавшылары Джантемир Аджиев, Авасхан Кульниязова, Оразали Копиев эм коьп баскалары автоювырысты уйгынлавшыларга разылыгын билдирдилер эм биз баьримиз де Уллы Енъуьв бизге кайдай баа берилип келгенин бир де мутпага керек тувылмыз деп беркиттилер.
М.Юнусов.
