Буьгуьнлерде тувган газетамыз сыйлы мерекесин белгилейди. Сол йыллардынъ ишинде редакцияда ислеген куллыкшыларды эсимизге аламыз. Соьйтип, мени мен бирге ислейтаган ис йолдасым Азинет Башиева коьплеген йыллар артта оны ман бирге ислеген Николай Никуленкоды эсине алды.

Мен сол аьдемнинъ акында, оьзим танымаган болсам да, билдируьв тавып, язбага мырат эттим. Кашан да, мен онынъ акында районымыздынъ суьврет фондын саклап койган Владимир эм Елена Уразакаевлерден сорамай болмадым. Суьйинишке, мен уьстине туьсип калганман. Коьплеген йыллар артта Николай Никуленко Владимир Уразакаев пен ислеген болыпты. Сол затты шайытлайтаган буйрык китабинде язылув бар.
Николай Никуленко моторист эм электрик болып ислепти. Печатник пен бирге сав кеше уйкламай, ол газетады шыгаратаган болган. Ол заманларда йогары вольтлы линиялар болмаган, ярык электростанциядан берилген, меним де эсимде, кешки 11 саьатте ярыкты тымдыратаган эди. Ярык тымган сонъ, газетады шыгармага уьшин редакциядынъ двигателиннен алганлар. Соьйтип ислеген Николай Никуленко, ол Владимир Уразакаев пен косылып, газетады эртенъ мен почтага аькеткен. Оннан баскалай, Николай Никуленко типографияда коргай иритетаган болган.
Азинет Башиевадынъ айтувы ман, сонъында Николай Никуленко печатниктинъ куллыгын эткен. Куллыктан тийисли тыншаювга кеткенде де, оны тилеп, печатник керексе, аькелетаган болганлар.
Николай эм Раиса Никуленколар Терекли-Мектебте яшайтаган эдилер, уьш балады тербияладылар, оьстирдилер. Буьгуьнлерде олар баска ерлерде яшайдылар. Никуленколардынъ аьелин Терекли-Мектебте ийгилик пен эскередилер. Биз де, «Шоьл тавысы» республикалык газетасынынъ куллыкшылары бизден алдын ислеген куллыкшылардынъ бактылары ман кызыксынамыз, оларды эсимизде саклаймыз.
Г.Абдулакимова.
Суьвретте: Н.Никуленко.