Озган юмадынъ ишинде Махачкала каласында II дагестан халклар ара турист «OPEN DAGESTAN» форумы болып озды. Шарада Дагестан Республикасынынъ Аькимбасы Владимир Васильев катнасты. Регионнынъ турист амаллары акында айтканда, республика басшысы белгиледи: «Мунда даьмли азык-туьлик, ийги этип ас асадылар эм аьдеттеги шынты конаксуьерлик».– «Дагестан таварыхлары» деген проект белгиленди. Мунда 12 маршрут белгиленди, 18 муниципалитетлерде ярасык ерлер коьрсетилеек. Регионда 6 турист майданлар аьрекетлейдилер. Аьлиги заманнынъ буйымлары ман бирге ерли яшавшылар сатув ман каьр шекпеге болатаган термелер туьзиледилер. Дагестан – ярасык майдан, мунда карамага, даьмин татпага, оьзи мен алып кетпеге эм Дагестанда оьткерген заманы акында эскермеге амал бар, – деп соьйледи Дагестан Аькимбасы.

Ногай районыннан делегацияды «Ногайский район» МР администрациясынынъ аькимбасынынъ орынбасары Баймагомед Ярлыкапов етекшиледи. Форум барысында «Туризм эм тыншаюв» деген халклар ара турист выставкасы озды. Бизим районды выставкада «У Гульзары» конакуьй коьрсетти. Миллет майданлары арасында «Ногай азбар» термеси де бар эди. Дагестан Республикасынынъ Аькимбасы Владимир Васильев бизим термеге кирип, даьмли ногай асларынынъ даьмин татты. Республикамызда туризм амаллары бар эм оларды оьрлендируьв керек деген шакырув астында форум оьтти.

А.Акбердиев,
«Яслык» яслар организациясынынъ етекшиси.