Дагестан Республикасынынъ Ногай районында шатлыклы аьлде Сылув-Тоьбе авыл куьни белгиленди. Шарада ДР Халк Йыйынынынъ депутаты М.Авезов, «Ногайский район» МР аькимбасынынъ орынбасары Р.Шангереев, Карасу авыл аькимбасы Я.Динакаев, район ясуьйкени З.Аджибаев, Ногай районынынъ Чернобыльшылар союзынынъ председатели Р.Кунтувганов, техникалык илмилер докторы, профессор С.Аджиманбетов эм баскалар ортакшылык эттилер. Байрамга бу авылда яшаган эм ислеген аьдемлер келдилер. Шатлыкты юритуьвшилер – ЦНТ куллыкшылары Гульгерен Савкатова эм Бурлиянт Курманова авылдынъ туьзилуьви эм оьрленуьви акында хабарладылар. Шарады ДР-нынъ ат казанган артисткасы А.Тунгатаровадынъ етекшилеви астында балалар хореографиялык «Карлыгаш» ансамбли ашты. Хошлав соьзи мен шыгып Карасу авыл аькимбасы Янибек Динакаев соьйледи. Бу авылда Динисламовлардынъ, Динакаевлердинъ бир неше несили куллык эткен, олар авылда етекши орынларды алганлар, оькимет баргыларга тийисли болганлар.
Авыл басшысы баьрисин де байрам ман кутлады. Авылдынъ аьвелгиси акында хабарлай келе, ол Сылув-Тоьбе яшавшылары коьплеген аьрекет тармакларында уьстинликлерге етискенин белгиледи. Авыл яшавшыларын эм конакларды байрам ман Рашид Шангереев кутлады эм авылга оьрленуьвди, онынъ талаплы эм куллыксуьер яшавшыларына ден савлык, уьстинликлер йорады.
Кутлав соьзин ДР Халк Йыйынынынъ депутаты М.Авезов айтты. Ол авыл куьни мен баьрисин де кутлады эм разылык хатты, СССР туьзилгенли 100 йыллыгына медальди профессор Султанхан Багат увылы Аджиманбетовка тапшырды. Солай ок ога Карасу авыл администрациясы атыннан разылык хатты бердилер. СССР туьзилгенли 100 йыллыгына медаль Карасу авыл яшавшысы, пенсионер Тоймурза Танаевке тапшырылды.
Коьплеген данъклы инсанларды оьстирген бу ер. Кутлав соьзин профессор С.Аджиманбетов, Карасу авыл ясуьйкени Е.Копиев эм Ногай районынынъ Чернобыльшылар союзынынъ председатели Р.Кунтувганов соьйледилер. Байрамда концерт программасы да коьрсетилди. Шатлыктынъ ярасыклыгы саьбийлер эди, олар бийидилер, ятлав айттылар, йырладылар. «Сылув-Тоьбе» деген йырды (соьзи С.Майлыбаевадыкы, анъы Курманбике Аджиманбетовадыкы) Равхан Солтанова йырлады. Солай ок байрамда Ногай патшалык саз алатлар оркестрининъ солистлери, йырлавшы Бегали Куруптурсунов ортакшылык эттилер. Иши ярасыклы келбакланган эки терме курылган эди, келген конаклар сонда кирип, шай иштилер, суьвретке туьстилер. Суьйинишли, авылда аьлиге дейим саман уьйлер бар, мунда озган юзйыллыкта бизим атайлар, тетейлер яшаганлар. Байрамнынъ тамамында ойынлар, ярыслар, сарынлар конкурсы уйгынланды. Байрам бек кызыклы болып оьтти.
Г.Бекмуратова
Суьвретте: шарадан коьринис.