Элимизге туьскен кыйынлыклар буьгуьнлерде биревди де аямайдылар. Аталыгымыздынъ эр кисилери согысувларда оьлсе, уьйлерге баьле-каза келеди. Оьзининъ ялгыз увылын коьрге салган анага бу яшавдынъ туьрли туьсли бояклары йойытылады, болса да оьз эрки мен спецоперациясына кеткен Руслан Шандиевтинъ ата-анасы анълайдылар, олардынъ увылы баскалай карар алып болмаган, онынъ сайлавы дурыс эм заманы ман.
Руслан Шандиев ДР Ногай районынынъ Батыр-Мурза авылында тувып-оьскен. Бу авылда онынъ балалыгы оьтти, ерли мектебте 9 класс битирди, сонъында йогары классларды окымага Нариман авылына кеткен. Аьелде ялгыз увыл, Руслан оьз карындаслары Зейнаб эм Динарага бек ийги аданас, ата-анасына – ийги увыл болган. Мурзали эм Салимет Шандиевлер балаларына билим бердилер, олар суьйикли кеспилерин сайлап, ислеп турадылар. Руслан Черкесск каласында патшалык технологиялык институтын битирген, «менеджмент» кесписин алган. Сонъында ерли полицияда, МЧС, подстанцияда куллык эткен.
«Инсан оьз бактысын оьзи курады» деген соьзлерди коьп айтамыз. Болса да, арада бир бакты бизим куьндегилик яшавымызга оьз сынавларын киргизеди. Сол заманда биз бир зат та этип болмаймыз. Руслан Шандиевтинъ яшавында да сондай сынавлар болды. Аталыкка кыйынлык туьскенде, ол ойланмай, согыс спецоперациясына оьз эрки мен кетти.
Руслан Шандиев ДНР еринде Ясиноватовский районынынъ Ново-Бахмутовка авылында коькек айынынъ 8-нши куьнинде ян берген. Ол Батыр-Мурза авылында койылган.
Аьдем оьлсе, эс калады. Руслан Шандиевтинъ акында эс онынъ ата-анасынынъ, карындасларынынъ, кардаш-тувганларынынъ юреклеринде калаяк. Онынъ увыллары Хабиб эм Низам, кызы Аиша атасын эслеринде саклаяклар. Эгер биз баьтирлеримизди эсимизде сакласак, олар дайымларга тирилер сырасында калаяклар.

Г.Бекмуратова
Суьвретте: Р.Шандиев.