Халкымыздынъ ваькиллери республикамыздынъ бас каласында яваплы ис орынларда аьрекетлеви кайсы заманларда да оьктемлик тувдырган. Олардынъ оьз мырадына, билимге ымтылысы, шалысувы бизди куьезлендирмей болмайды. Оьзининъ йигерлиги мен, тыныш болмаган куллыкты бажарымлы толтырувы ман, олар баска халклар арасында оьзининъ кишкей халкы акында ийги ой тувдырганы, ийги соьз бен айттырганы да бек яхшы. Республикамыздынъ бас каласында яваплы ис орынларда ислеген сол коьп болмаган аьдемлер сырасына Зарина Арсланбиевна Уразаева киреди. Ол оьзининъ окытувшылары эткен уьйкен сенимлерин аклады деп ойлайман.
Зарина кишкей заманнан алып аьр дайым да алдыда, ийгилердинъ сырасында болган. Ол Кадрия атындагы мектебти уьстинликли, оннан сонъ Саратовтагы Патшалык ыхтыяр академиясындагы юристлер колледжин кызыл дипломга окып тамамлаган. Юрист колледжиннен сонъ оны артык билимге ымтылысы Дагестан оькимет университетининъ юрист факультетине аькелген. Йогары окув ошагыннан да кызалак тувган ерине кызыл диплом ман кайткан. Мунда ол «Ногайский район» МР администрациясында алдышы специалист-административли комиссиясынынъ секретари болып куллык этеди. Оннан оьзгелей, район администрациясынынъ Терроризмге карсы аппаратынынъ сырасына кирген. Бу куллыкты да Зарина Уразаева шалысып толтырды, туьрли шаралардынъ, тоьгерек столлардынъ куллыгында ортакшылык этти, Ногай район администрациясы ман окувшыларга уйгынланган конкурсларынынъ озгарылувында катнасты. Онынъ бу яваплы исти толтырувын Москвадагы куллыкшылар тергеген эм дайым да исин тийисли дережеде бардырганын белгилегенлер. Бу куьнлерде Зарина оьзининъ маслагатшысы, насихатшысы Рашид Заргишиевтинъ эткен коьмегин уьйкен разылык пан эсине алады. Зарина онынъ коьмекшиси болып Ногай район прокуратурасында бир йыл узагына ислеген. Ясы уьйкен куллыкшы яс кызды туьрли кагытлар туьзип уьйреткен, оьзининъ ис сулыбы ман боьлискен.
Зарина Арсланбиевна бир неше кере озгарылган туьрли конкурсларда катнаскан. Сол шараларда ийги сырагыларга етисуьвинде, бек маьнели болган онынъ тек енъуьв мен байланыслы тувыл, бас деп ис сулыбын байытув ниети.
Зарина Уразаевадынъ ийги иси белгиленмей калмайды, эм ол Дагестан Республикасынынъ Аькимбасынынъ эм Оькиметининъ Администрациясында бас специалист- эксперт куллыгын юритип баслайды. Бу куллыкты юритпеге ога Ногай район администрациясында ислеген йыллар алган сулыбы ярдам этеди. Кайратлы яс кыз ДР Аькимбасынынъ эм Оькиметининъ Администрациясында ислеген 3 йыл ишинде оьзин яваплы куллыкшы этип коьрсетеди эм янъыларда ДР Аькимбасынынъ эм Оькиметининъ Администрациясында ерли самоуправление органлары ман биргелес аьрекетлев бойынша боьлигининъ етекшиси этип беркитилди. Биз Зарина Арсланбиевнады янъы ис орынга беркитилуьви мен ак юректен кутлаймыз эм уьстинликлер йораймыз. Сондай кайратлыкты эм билимлерге ымтылысты баска ясларга да йораймыз.
Н.Эрежепова.
Суьвретте: З.Уразаева.
