Янъы технологиялар заманында оьмиримизди суьремиз. Кайсы ерлерде де туьрленислер болып турады. Бир эки онйыллыклар арттагы яс аьдем мен буьгуьнги яс аьдем араларында айлак уьйкен болган баскалыклар бар. Акыл яктан болмаса да, яшавда кайдай аьллерден де шыгып болувда сол туьрленис коьринеди. Бу баска хабар.

Аьли соьзимиз йыл узагында балаларды оьрлендируьв уьшин аз куьшин салмаган Нариман авылынынъ орта мектебининъ окытувшысы Нурманбет Тангатар увылы Зарманбетовтынъ етискен уьстинлиги акында. Янъыларда Нариман авылынынъ Алимхан Асанов атындагы мектебине Билимлендируьв технологияларынынъ оьз ыхтыяры ман сертификациялав тармагыннан алтын сертификат келди. Сол савгага йогарыда белгилеген мектебининъ тийисли болувы босына тувыл, эм бу тамамга да етисуьв енъиллерден болмаган.
Коьп йыллардан бери оьзининъ окытувшылык ис аьрекетин йогары дережеде юритип келетаган Нурманбет Тангатарович Зарманбетов балаларды оьрлендируьв уьшин оьзининъ бар куьшин аямайды. Ол тербиялайтаган балаларды кайдай болса да: район, республика, туьрли сайтларда Интернет аркалы озгарылатаган шараларда катнастырмага амал болса, катнаспай озбайды. Сулыплы окытувшы баладынъ ясав оьнери барын коьрсе, ол оны ман айырым куллык та этеди. Алтын сертификаттынъ иелери «Балалар уьшин шаралар орталыгында» ОУ сынавларды оьткенлер. Солардынъ тамамларына коьре, алтын савгага да тийисли болдылар. Сол савгадынъ иштелигинде Ногай районымыздынъ билимли окытувшыларынынъ бириси Нурманбет Зарманбетов яс несилди тербиялавга уьйкен эс берип карайтаганы акында айтылады.
Буьгуьнги савгадынъ иелерин ак юрегимизден кутлаймыз, бу сизинъ етискен етимисинъиздинъ тек басы болсын, алдыда тек йогары енъуьвлерди эм солар баьриси де яс несилди тербиялавга багысланган болганын йораймыз.
Г.Курганова.
Суьвретте: Н.Зарманбетов оьз окувшылары ман.