Янъыларда бизге бек куванышлы хабар етти. Ханты-Мансийск автономлы округындагы Сургут районынынъ аькимбасынынъ орынбасары Татьяна Османкина сол ок каладынъ нефть эм газ институтынынъ 1-нши курсынынъ студенти Курман Исакаевти «Исси юрек» деген омырав белгиси мен савгалады. Федоровка поселогынынъ яшавшысы Курман Исакаев озган 2019-ншы йылда аьели мен поселоктан узак болмаган ерде орынласкан коьлде тыншаюв заманында, кишкей кызалак сувга ютылаятырганын коьрип, оны куткарган. Сол заманда сувдынъ ягасында тыншаятаган аьдемлер коьп болганлар, ама ногай ясымыз Курман сувга кетеятырган балады биринши болып коьрген эм, коьп ойланып турмай, оны куткарувга асыккан. Соьйтип, замандасымыз Курман Исакаев кызалакты терен коьлден шыгарган. Оьзи аьруьв этип ялдап билмесе де, Курман балады оьлимнен саклаган. Онынъ эткен йигитлиги уьшин, Россия Федерациясынынъ социал-гуманитарлык баславлар бойынша Ямагатшылык фонды Курманды «Исси юрек» деген омырав белгисине тийисли эткен.

Сондай болып, бу Фонд аьлиге дейим болган йигитлик ислерге багыслап, сыйлы китап шыгармага токтаскан эм Курман Исакаевтинъ йигитлиги акында да онынъ бетлерине билдируьвлер киргистилген. Биз Курманды сондай йогары савгады алувы ман ак юректен кутлаймыз. Курман геолог болмага мырат этеди. Онынъ атасы Хусейн «Сургутнефтегаздынъ» ПАО-нынъ «Комсомольскнефть» цехининъ 5-нши разрядлы операторы болып куллык этеди. Анасы Диана оьз балаларына ийги тербияды берип билген бавырмалы ногай кыскаяклы болады.
– Биз мундай шакта ярдамга асыкпага кереги акында ОБЖ дерислеринде билгенмиз. Сол заманда мен аьли де аьруьв ялдап билмейтаган эдим. Атам мени сувда ялдавдынъ сырларына уьйретти. Кызалакты куткарувым уьшин мага сосындай йогары савга берерлер деп, ойланмаганман. Савболсынлар! – деди Курман Исакаев.
А. Найманов.
Суьвретте: Курман Исакаевке савга тапшырылув мезгили.