Янъыларда Геметюбе авыл орта мектебининъ музейинде 5-11-нши классларынынъ окувшыларына тарих дерисиннен окытувшылары ман «Кавказ уьшин согысув» деген Йигитлик дериси уйгынланып оьтти. Кавказ уьшин согысув, баьтир халкынынъ бойсынмаслыгы уьшин куьресуьви тарих бетлерине йигитлик уьлгиси деп кирген. Ердеслеримиздинъ атлары Уллы Аталык согысынынъ тарихине алтын аьриплери мен киргистилгенлер. Деристи мектеб етекшисининъ окытув иси бойынша орынбасары, тарих дерисиннен окытувшысы Разият Салавдиновна Амангулова ашты. Ол бу окув йылында Кавказ ерлерин немец-фашист шапкыншылардан босатув куьнине 77 йыл болатаганын белгиледи.

Шарадынъ барысында окувшыларга презентация кебинде кавказ яшавшыларынынъ ийинлеринде сезген авыр куьнлери акында хабарланды. Балалар деристе Кавказ уьшин согысув Элимизге бек маьнели болганы, душпан ман согысувда каты урыслар юргени акында билимлерин арттырдылар. Тарих дерисиннен окытувшысы Муминат Салавдиновна Амангулова душпан ман алынган Кавказ ериндеги партизан козгалыслары акында хабарлап эситтирди. Мектебтинъ тарих-краевед музейининъ белсенли аьрекетшилери сол йыллардагы мектеб окытувшысынынъ Кавказ уьшин урысларынынъ катнасувшысы, «Кавказды коршалав уьшин» деген медалининъ иеси Хизри Казиевич Гаджиевтинъ йигитлиги акында айттылар. Деристинъ сонъында окувшылар, 77 йыл оьтсе де, элимиздинъ, тарихимиздинъ эм тувган еримиздинъ йигитлик бетлерин эслеримизде тутпага борышлымыз деген тамамга келдилер.
Дерис шарага йыйылган окувшылардынъ бир такыйка уьндемей турувы ман тамамланды. Баска болып, авыл орталыгында орынласкан эстелигине шешекей байламы салынды.