Келеек йылдынъ канътар айында Турция элиндеги Ялова каласында ТЮРКсой деген Халклар ара организациясы совет эм дагестан шаири Кадрия Темирбулатовага эстелик ашпага мыратланады.
2019-ншы йылда сол ок организациясы ман Турция Республикасынынъ Анкара, Адана, Эскишехир эм Ялова калаларында замансыз дуныядан кешкен Кадриядынъ 70 йыллык мерекесине багысланып шаралар озгарылдылар. ТЮРКсой ман Кадриядынъ 12 тиллерине коьширилген ятлавлар китаби де шыкты, баска болып Яловада шаирдинъ аты ман проспект ашылды эм келеекте шаирдинъ салынаяк эстелигин курув уьшин тасы аьзирленди. Буьгуьнлерде Кадрия савлай дуныяга белгили болды. Онынъ ятлавлары тек тюрк тувыл, Европа дуныясындагы эм Азия тиллерине де коьширилгенлер. «ТЮРКсой» деген Халклар ара организациясы ман Кадриядынъ эстелигин ез бен ясамага ногай суьвретшиси эм скульпторы Кошали Зарманбетовка ыхтыяр берилген эди. Эстелик ногай маданиятынынъ сакланув эм оьрленуьв бойынша фондынынъ (Фонд ВСНТК) демевлиги мен толтырылган эм аькелинген эди. Буьгуьнлерде Фонд скульптор Кошали Зарманбетовка ногай халкынынъ саниятына эткен косымы уьшин уьйкен разылыгын билдиреди. Онынъ кайтарылгысыз скульптурасы эм графикасы коьп йыллар бойы Россия эм халклар ара озгарылатаган выставкаларда, фестивальлерде эм ярысларда баалавшыларды суьйиндирип келеди. Ногай маданиятынынъ сакланув эм оьрленуьв бойынша фонды ногай шаири Кадрия Темирбулатовадынъ эстелигине багысланып озгарылган шаралар уьшин «ТЮРКсойдынъ» бас секретари Дюсен Курабаевич Касеиновка, онынъ коьмекшиси Барыш Джавидке разылыгын билдирген. Фонд, солай болып, разылык соьзлерин ногай халк яратувшылыгынынъ асабалыгына, талаплы ясларга демевлик этуьвде, Кадрия эстелигин еткеруьвди уйгынлавда Ногай районынынъ аькимбасы Мухтарбий Аджековка, район орталык китапханасынынъ етекшиси Сабират Абубекеровага, Фонд токтастырувшылары Эльмира Кожаевага, Асият Койлакаевага разылыгын билдирген. Айырым разылык ярдамласувы уьшин Солтанмурад Караяновка билдирген. Белгили шаиримиздинъ аты дуныялык поэзиясында алтын аьриплер мен язылган.
А.Джанаева.
Суьвретте: Кадриядынъ аьзирленген эстелиги.
