Уьндирикте — янъы китап __________________

Янъыларда Москва каласында «Кавказский сборник» деп аталган китабининъ 11-нши топламасы баспадан шыккан. Китап Россия МИД МГИМО, Халклар ара тергевлер институты, Регионлар кавыфсызлыгы эм Кавказ маьселелер бойынша орталыгы ман аьзирленген. Китапке Кавказдынъ тарихи, археологиясы эм этнологиясы бойынша макалалар киргенлер. Солай ок, китапте Кавказ еринде болган Граждан согысы акында россия эм шет эллер архивлеринде табылган макалалар баспаланганлар.

Сондай оьлшеми болган китапке Караногай еринде болып кеткен эм бизим ерлеримиздинъ оьрленуьвине оьз косымын эткен, сонъгы пристав Ф.И.Капельгородскийдинъ язувларыннан да, аьлим-этнограф Ахмет Ярлыкаповтынъ куьш салувы ман кирген.

Китап эки боьликтен туьзилген: тарих эм булаклар.

Китаптинъ биринши кесегинде В.Чха-идзединъ «Ногайцы Восточного Приазовья во второй половине XVIII-XIX веков по данным археологии и антропологии» макаласы дуныя ярыгын коьрип туры.

Экинши кесегинде Караногай приставы Филипп Капельгородскийдинъ колязбасыннан алынган макаласы эм Ахмет Ярлыкаповтынъ ойлары баспаланганлар.
Китапте бек кызыклы макалалар бар. Китап тарихшилер, этнологлар, археологлар уьшин бек кызыклы эм тергевлер уьшин пайдаланмага болаяк.
Китаптинъ 12-нши топламасына да Ф.Капельгородскийдинъ колязбаларыннан макалалар кирееклер.

Г.Курганова.
Суьвретте: А.Ярлыкапов китап акында ойлары ман боьлисуьв шагында.