Мунира Узбековна Межитова (суьвретте) мине 2007-нши йыллардан бери «Газпром газораспределение Дагестан» Ногай районы бойынша ЭГС авария-диспетчерлик службасында диспетчер аьрекетин етимисли юритип келеди. Ол Кумлы авыл орта мектебинде билим алганнан сонъ, Махачкаладагы педагогикалык институтын тамамлап, Ногай районында Яшавшыларды социаллык ягыннан канагатлав орталыгында специалист куллыгын уьстинликли юритип келди. Буьгуьнлерде ол авария-диспетчерлик службасынынъ етимисли аьрекетшиси. Оьз ис аьрекетин Мунира яны ман суьеди эм ога толысынша берилип, каныгыслы аьлде куллык этеди.

Мунира Узбековна ян косагы, Куьнбатар авылынынъ ясы Аскерхан ман, татым аьел курып, эки аьвлетлери – Наиля эм Лейлады асырап-оьстирип, яшав йолына онъладылар. Олар буьгуьнлерде доьрт йиенлерининъ етимислерине куьезленип келедилер.
Канътар айынынъ биринши куьнинде Мунира Узбековна оьзининъ 50 йыллык мерекесин белгилейди. Мунирады биз ак юректен келеятырган Янъы йылы ман эм тувган куьни мен кутлап, берк ден савлык, узак оьмир, куллыгында етимислер йораймыз.
Г.Нурдинова.