Дагестанда РЖД ман бирге электропоездлер йиберилуьв уьстинде сорав каралув планга алынады. Бу аэроэкспресслер регионда болган сынъар аэропорт эм эки кала Махачкала ман Дербент ортасында юрееклер. Сонынъ акында Дагестан Аькимбасы Сергей Меликов билдирген.
«Шоьл тавысы» республикалык газетасынынъ бас редакторы Эльмира Кожаева дагестанлыларды сол янъылык суьйиндиргенин белгилейди.
– Келеекте бизим республикада аэроэкспресслер болувы Дагестанда туризм темасы коьп заманларга эм дайымга калаягы акында айтады. Бу йыл тек яз мезгилининъ яртысында Дагестанга миллионнан артык туристлер келдилер. Куьннен-куьнге республикага келетаган конаклардынъ саны оьседи, сол бек ийги. Олардынъ онъайлыгы уьшин мунавдай керекли проектлер шыгады: аэропорт эм бизим уьйкен калаларымыз арасында темир йол салынувы. Эгер турист бар болса, конак бизим уьйкен калаларымызга барар уьшин онъайлык та керек, – деди Эльмира Кожаева.