Кенъ Ногай шоьллигининъ кушагында орынласкан Эдиге авылында таза намыслы, мен деп коькирегине какпаган, коьзге коьп илинмеге суьймеген кеде яшаган. Ол авыл ериндеги кеделер мен бирге ерли мектебте окыган, яслай уьйшилик хозяйствосында ислеп уьйренген, язда пишен шалган, Шобытлыда балык ысламага, ат уьстинде шаппага, техникага амырак болган.
Мектебтен сонъ Кожахмет Янибековты аьскер сырасына шакырдылар. Савытлы куьшлер сырасында эр борышын толтырып тувган авылына келген сонъ, Ногай шоьллигининъ куьнбатар япсарындагы Уьйсалган авылдан суьйикли кызы Бариятка уьйленеди. Сонъында яс аьел Воронеж областиндеги Павлов районына ислемеге кетеди.
Оьткен йылдынъ басында конъысы Луганск эм Донецк областьлерине Россия аьскерлери киргистилип, согыс спецоперациясы басланганда, Кожахмет оьз ыхтыяры ман «БАРС-12» деген доброволецлер отрядынынъ сырасына язылады. Бу аьскер боьлигининъ санында СВО зонасында оьтип турган согысларда йигитлерше ортакшылык этеди. Мине мунда Кожахмет Янибековка ол яслай армияда болган заманында алган аьскерши кесписи бек керекти. Ол тагы да «КАМАЗ» согыс автомашинасынынъ телбегесин колына алды.
Бир кере оьзине тапшырылган дав борышын толтырып турган аьсеринде Кожахметтинъ автомашинасы ракеталар атувы астына туьседи. Оьзи ол сол согыста аьлемет аьлде аман-эсен калады. Муннан сонъ ога эндигиси «Урал» автомашинасынынъ телбегесин колына алмага туьседи. СВО зонасында Кожахмет Янибеков сырасында болган аьскер боьлиги Белогоровка эм Северодонецк, Рубежный эм Лисичанск районларында орынласкан болган.
Былтыр декабрь айында йигерли ердесимиздинъ контрактынынъ заман болжалы кутылады. Кожахмет оьзи яшайтаган Воронеж областиндеги Павлов районына кайтады. Буьгуьнлерде ол Москвада автобус водители болып куллык этеди. Болса да соны ман ис кутылмайды: атасынынъ аьскершилик байрагын увылы Раймир коьтереди. Ол аьлиги заманда СВО-дынъ алды фронтында, оьзининъ атасынынъ орынын алып, Тувган Элин явдан коршалайды.
Янъыларда СВО еринде контракт бойынша куллык эткен аьскерши Кожахмет Янибеков Воронеж областининъ Павлов районынынъ аькимбасынынъ колыннан согыс ЛНР савгасын – «За боевые заслуги» медалин алды.
– Сабыр кылыклы, коьп соьзсиз аьдем. Хатыны Барият пан бирге олар патриот увылларын да асырап оьстиргенлер. Олардынъ уьйкен увылы буьгуьн контракт бойынша аьскершилик борышын толтырады. Ондай аьдемлер – коьплер уьшин ярык коьрим, олардынъ аркасы ман тек бизим районымыз тувыл, савлайы элимиз аяк уьстинде турады, – деп белгилеген Павлов район администрациясынынъ басшысы Максим Янцов савгады тапшыраятып, эм бизим ердесимизге Аталыгына алал эм ийги кепте куллык эткени уьшин разылыгын билдирген.
М.Ханов.
Суьвретте: Кожахмет Янибеков Павлов район аькимбасы
