Федерация субъектлеринде газ тармаклары салынган хыйлы авыллар бар, ама солардагы бирер яшавшылардынъ уьйлерине аьли де газ еткерилмеген. Соны эсапка алып, газ еткеруьв программасы гражданлардынъ ер участокларынынъ япсарларына дейим газды тегин кепте тартпага амал береди. Сол себептен газетамыздынъ хабаршысы ООО «Газпром межрегионгаз Дагестан» Ногай районынынъ ЭГС начальниги Шамиль Акбулатовтан бир неше соравларга яваплар алган.

– Шамиль Батирханович, элимизде юритилип турган газ еткеруьв программасы бойынша бизим Ногай районынынъ газификацияланган авылларында газ еткерилмеген уьйлерине газопроводка косув акында не зат айтпага боласыз?
– Газопроводлар бар болган авыл ерлериндеги газ еткерилмеген уьйлерди куьнибурын инвентаризациялав ислери бойынша сводный план туьзилген эди. Сонынъ сырагысында районнынъ газификацияланган авыллары бойынша 1035 уьйлерге эндиги де газ еткерилмегени белгиленген. Солардынъ хыйлысы – Терекли-Мектеб эм Нариман авылларында. Район орталыгында, айтпага, 400-ге ювык уьйлерге газ еткерилмеген деп саналады.
Былтыр социаллык газификация программасы басланганнан алып йылдынъ ызына дейим газ еткерилмеген район яшавшыларынынъ уьйлерине дейим газ тармагын аькелуьв акында 65 аьризе туьскен. Олар баьриси де газификациядынъ ортак бир операторынынъ порталына киргистилгенлер.
– Уьйлерине газ еткеруьв кереги акында аьдемлер аьризелерин кайда элтемеге эм соларга косып кайдай документлер бермеге тарык?
– Аьризелерди авыл администрацияларына, МФЦ-га элтемеге яде госуслуги аркасы ман бермеге болады. Болса да, аьдемлерге бизим ЭГС меканына келип бергени аьруьв болар, неге десе аьризеди еринде толтырмага бизим специалистлер коьмек этедилер. Бу ерде аьризе мен косып ер участогына эм уьй меканына байырлыгы барлыгы акында «зеленка» кагыты, паспорт, ИНН эм снилс берилмеге керегеди.
– Газ аьли де ер учас- тогына дейим элтенмеген аьдемлер газ еткеруьв программасы эсабында газ тармагына газ алатын косув акында келисуьв туьзбеге боладылар ма?
– Биз сондай аьдемлердинъ уьйлерине газопроводка косув акында келисуьвлер туьземиз. Оннан сонъ газ тармагыннан сол уьйлердинъ нешаклы эрек турганын эсапка алып газопроводка косув заманын белгилеймиз.
– Сиз бу программады яшавга шыгарувда катнасаяк боларсыз, сол себептен быйылдынъ ызына дейим ра- йон еринде газификацияланмаган неше уьйлердинъ ер участокларына дейим газ еткереексиз?
– Биз бу программады яшавга шыгарувда, элбетте, катнасаякпыз. Бизге сол куллыкларды этуьв уьшин материаллар берилеек. Газ еткеруьв ислерин туьскен аьризелер бойынша быйыл март айында баслаякпыз. Быйылдынъ ишинде бас деп сол бизге туьскен 65 аьризе беруьвшилердинъ уьй участокларына де- йим газды еткереекпиз.
– Биздеги авылларда йыл сайын янъы уьйлер эм орамлар курылып турады. Газ тармагы бар болган авылларда янъы курылган орамлардагы бирер уьйлердинъ иелери газды уьйлерине оьзлери тартып койыптылар. Сондай аьдемлердинъ ер участокларына дейим газ еткерилеекпе экен?
– Янъы орамлардагы янъы салынган уьйлер иелерининъ, эгер лицевой счеты бар болса, олардынъ уьйлери газ еткеруьв программасына кирмейдилер. Бизде соьйтип оьз уьйлерине оьзлери газ еткерип, лицевой счетлар эткен аьдемлер аз тувыл. Болса да, мысалы, янъы бир орамдагы энъ ызгы уьй газ еткеруьв программасына кире калса, сонынъ аркасы ман сол ок орамдагы бу программага кирмеген баска уьйлерге де газопроводка косылмага амал табаяклар.
Хабарласувды М-А.Ханов юриткен.