Дагестан Республикасынынъ япсарларында оперативли аьллер коьрсеткенлей, аьли болатаган кыянатлыклардынъ бас себеби – законга карсы кулланылатаган савыт-садак.

2021-нши йылдынъ оьткен 12 айы ишинде Дагестан Республикасы бойынша 1224 кыянатлык этилгени регистрацияланган, солардынъ 120-сында – законга карсы айланувдагы савыт-садак кулланылганы коьрсетиледи. Дагестан Республика Оькиметининъ «Гражданлар ман законсыз сакланып атылатаган савыт-садакты оьз эрки мен аькелдируьвди уйгынлав бойынша шаралар акында» деген 184-нши номерли (2014-нши йылдынъ коькек айынынъ 24-нши куьнинде кабыл этилинип алынган) эм Дагестан Республикасы бойынша МВД-сынынъ 105-нши номерли 2022-нши йылынынъ канътар айынынъ 18-нши куьнинде кабыл этилинип алынган токтасларын толтырув ниет пен Ногай район япсарларында уьстимиздеги йылдынъ увыт айынынъ биринши куьниннен алып карагыс айынынъ 31-нши куьнине дейим, «Оружие-выкуп» деп аталган оперативли-профилактикалык шарасы озгарылады.
Бу айтылган шарадынъ бас мырады – законга карсы, тийисли документлери болмаган савыт-садакларды уьйлеринде саклаган аьдемлерге оьз ыхтыярлары ман аькелдируьв.
Россия Федерациясында законга карсы савыт-садакты кулланув, саклав– уголовлык яваплык. Уголовлык Кодексининъ 222-нши статьясына коьре, законга карсы савыт-садакты алып юруьв, бир ерден баска ерге коьшируьв – 2 йылдан 4 йылга дейим аьдемди эркинликтен босатувга ыхтыяр береди. Ама сондай савыт-садаклары болган аьдемлер оьз ыхтыярлары ман аькелген ерде, олар яваплылыктан босатыладылар эм акшалай компенсацияга тийисли боладылар. Айтпага, тапанша, гранатометлардынъ туьрлилери, оьзи тапанша, оьзи топты аькелсенъиз, 45 мынъ маьнет алмага боласыз, автомат, мылтык – 60 мынъ маьнет, пулемет – 75 мынъ маьнет, анъшылав мылтыгы, кеплерине коьре, 9 эм 4, 5 мынъ маьнет акша, аталык яде шет эллерде шыккан газ тапаншалар, топ уьшин 1 мынъ 500 маьнет акшалай бериледи, заводта шыгарылмаган тапаншалар, туьрли атылув алатлар уьшин 3 мынъ маьнет акша бериледи. Кыскаша айтканда, аьр бир атылув алаттынъ оьз баасы бар. Соларды оьз ыхтыярынъыз бан аькелсенъиз, баьри зат та белгили болар.
Баьри сизде тувган соравларынъызды Ногай районы бойынша Россия МВД боьлигине 21-4-78 яде 8-928-284-92-02 телефон номерлерине тел согып, бермеге боласыз.
Н.Каракаев, Ногай районы бойынша Россия ОМВД етекшиси.