Район администрациясында____________
Ногай районынынъ администрациясында озгарылган кенъесте от туьсуьвге карсы талаплавларды тутув эм коронавируслы инфекция бойынша аьллери акында соравлар каралды. Кенъести Ногай район аькимбасы Мухтарбий Аджеков етекшиледи, йыйында авыл администрациялар басшылары, район организациялар етекшилери, ямагат организациялар председательлери катнастылар. Район аькимбасы иссилик пен тынышсызланганын билдирди эм авыл басшыларына сак болынъыз, от туьсуьвлердинъ алдын шалынъыз деп тилек салды.
– Район еринде от туьсуьвге карсы режим аьрекетлейди, сол талаплавларга коьре, орманлыкка автокоьлик пен барувды токтатпага керек. Правосаклав органларынынъ куллыкшылары эм волонтерлар тоьгеректи от туьспесин деп тергейдилер. Олардынъ аркасы ман орманлыкка аьдемлердинъ барувы тоьмен болды. Аьлиги куьнлер айлак исси болып туры, иссилик 42 градуска дейим коьтерилген куьнлер де болды. Сак болынъыз, орманлыкка барманъыз деп район яшавшылары ман анълатув хабарласувлар юритинъиз. Эгер бир ерде от туьссе, савлай авлакка яйылмага болады, –деп соьзин авыл басларына каратты М.Аджеков.
Коронавируслы инфекция ман байланыслы сорав бойынша Ногай район орталык больницасынынъ бас врачынынъ орынбасары З.Куруптурсунова шыгып соьйледи. Онынъ айтувына коьре, коронавируслы инфекция ман авырыйтаганлардынъ саны тоьменлейди, ама пневмония ман авырып келетаганлар аьли де бар, сога коьре аьллерди аьли де авыр деп айтпага болады. Карантин болжалы ишинде баьриси 415 аьдем регистрацияланган, коронавирус пан авырганлар – 415, пневмония ман – 175. Аьлиги заманда больницада 38 аьдем эмленедилер, олардынъ ишинде коронавирус пан – 4, пневмония ман – 34 аьдем авырганлар. Уьйде 28 авырувлылар эмленедилер, З.Куруптурсуновадынъ айтувына коьре, олардынъ авырувы енъил оьтеди.
Мухтарбий Аджеков Ногай район яшавшылары атыннан медицина куллыкшыларына разылыгын билдирди.
Кенъести тамамлай келе, район аькимбасы ЕГЭ беруьвде выпускниклер йогары коьрсетуьвлер беретаганын белгиледи. Онынъ айтувына коьре, окувшылар 70 эм йогары балл аладылар, ол бек ийги коьрсетуьв болады. Мухтарбий Кошманбет улы Билимлендируьв управлениесининъ етекшиси А.Агаспаровага район окытувшыларынынъ сапатлы билим беретаганын белгилеп, савбол айтты.
