Терекли-Мектеб авылында 7-нши шакырувдынъ «Ногайский район» МР Депутатлар йыйынынынъ кезекли 46-ншы сессиясы болып оьткен.

Сессиядынъ «Ногайский район» муниципаллык районында муниципаллык орманлык тергеви акында положениеге эм айырым кепте сакланатаган табиат ерлерин саклав эм кулланувда муниципаллык тергеви акында положениеге туьрленислер киргистуьв акында» деген баслапкы соравы бойынша район администрациясынынъ «Ер тергев бойынша боьлиги» МКУ етекшиси Алимурза Менглиязов шыгып соьйлеген.
Депутатлар бу сорав бойынша тийисли карар кабыл эттилер.
Муннан сонъ олар солай ок «Ногайский район» МР администрациясынынъ «Капиталлык курылыс боьлиги» МКУ штат санына туьрленислер киргистуьв акында» деген соравды да ойласып керекли карар алдылар.
Сессиядынъ куьн йосыгы бойынша «Ногайский район» МР 2022-нши йыл эм план кезегиндеги 2023-2024-нши йыллар бюджетине туьрленислер киргистуьв, сонынъ санында йол фондынынъ карыжларын авыл поселениелерине беруьв акында» деген доклад пан «Ногайский район» МР администрациясынынъ финанс боьлиги» МКУ етекшисининъ орынбасары Зухра Адиева шыгып соьйледи.
Ол кайбир депутатлардынъ эм авыл аькимбасларынынъ ога берилген соравларына яваплады. Бу сорав ойласылып болган сонъ, сонынъ акында тийисли карар кабыл этилинди.
Бизим хабаршы.