А.Джанибеков атындагы мектебине мунда алдынгы йыллар окыган окувшылар 60 парта, олтыргышлар эм 8 класс такта савкатладылар. Сосындай савкат Янъы Уренгой каласыннан туьскен.

Тезден янъы окув йылы басланады. Коронавируслы маразынынъ пандемиясы ман байланыста окытувшылар ман окувшылар коьрисип болмадылар, эндиги олар янъы окув йылын куьтип турылар. Олар окыйтаган мектеблерин бек сагынганлар. Мунда, А.Джанибеков атындагы мектебинде, оларды муьлк куьтеди.

Педагогикалык коллективининъ атыннан уйгынлаганы уьшин ердесимиз Бегали Койлакаевке, солай ок бизим мектебти алдынгы йыллар окып тамамлаган окувшыларымыз – предпринимательлер Арсен Култаевке, Анвар Абубекеровка, бу исте белсенли катнаскан Эмре Елакаевке эм Аскер Дильманбетовка оьз разылыгымды билдиремен.

Выпускниклеримиздинъ эс этуьви бизге бек баа. Буьгуьн бу коьтергишлев куьшли сезиледи, неге десе мектеб муьлкте эм коьп баска затта керексинеди. Парталар артына келеекте болаяк окытувшылар, врачлар, космонавтлар олтырып окыяклар. Бизим балалар – бизим келеектегимиз! Аявлы выпускниклер, сизинъ коьтергишлевинъиз эм эткен коьмегинъиз баскаларга коьрим болсын, сизинъ ийги ислеринъиз оьзинъизге юз кабат болып кайтсын» – деп А.Джанибеков атындагы мектебининъ етекшиси Курасхан Ярикбаева «Шоьл тавысы» республикалык газетасынынъ корреспондентине хабарлады.