Ямагат аьрекети мен белгили болган «Русское радио» деген Россиядынъ миллет радиостанциясы, Сургут каласынынъ еринде «Созвучие» деген проекти бойынша оьткен сав 2019-ншы йыл бойы тынълавшыларды каладагы аьрекет этетаган туьрли ямагат биригуьвлерининъ маданияты эм аьдетлери мен таныстырып келди.

Канътар айынынъ басы да ХМАО-да яшайтаган халкларынынъ миллет асларынынъ презентациялары ман басланды. Бу амалламадынъ да бас мырады – Россия халкларынынъ арасында бирликти, дослыкты беркитуьв, олардынъ аьдети, маданияты ман таныстырув эди.

Проект бойынша башкир, шешен, молдаван, орыс, марий эм сондай баска халкларынынъ ваькиллери ортакшылык эттилер. Онда йыйналган аьр бир миллет ваькили оьз миллет асы акында кызыклы хабарладылар, оны кайтип аьзирленетаганы ман таныстырдылар.

Ногай яслар союзы атыннан ногайлар да сол проекттинъ катнасувшысы болдылар. Проектте ямагат биригуьвининъ белсенли аьрекетшиси Нурия Терикова ортакшылык этти. Ол бурынгы заманнан ногай халкында белгили болган, байрамларга аьзирленген миллет ун асы – катлама акында, ол кайтип этилетаганынынъ сыхыры ман боьлисти. Ногай халкында катлама суьт аслары каймак, пыслак эм ногай шайы ман берилгени акында айтты. Соьйтип амаллама йогары оьлшемде эм шатлыклы аьлде оьтти.

Суьвретте: Нурия Терикова.