Сургут каласынынъ Ногай яслар союзы уьстимиздеги йылдынъ тамбыз айынынъ 4-нши куьнинде Сургут каласында оьткен «Соцветие» деген йыл сайынлык миллет-маданият фестивалинде ортакшылык этти. Каладынъ орталык майданында оьз майданларын 17 миллет-ямагат биригуьвлери коьрсеттилер. Сол куьн 15 мынъ аьдем бу уьйкен этно-байрамынынъ конаклары болдылар. Аьр бир халк оьзининъ маданиятын, аьдетлерин ярасыклы коьрсетпеге шалысты, олар ман выставкалар, миллет ашханалары, яратувшылык коьрсетуьвлери аьзирленген эдилер. «Миллет ярасыклыгы» деген майданында Айбийке Мурзагельдиева «Бесик йырлары» деген ногай бесик йырларын сахнага шыгарып коьрсетти. Регина Шамшидинова «Ногай халкыма» деген янъы йырын йырлап эситтирди.
Сургут каласынынъ администрация агзалары аьр бир миллет уьйининъ конагы болдылар. Оларга деп «Кавказдынъ яны» деген биюв ансамбли Арсен Ашакаевтинъ етекшилиги астында хошлав эсабында «Тоьгерек» биювин бийип коьрсетти. Ногайлар оларды миллет аслары ман сыйладылар, эки халкты ногай камышы байланыстыратаганы акында хабарлап айттылар. Ногай йырлавшысы Узаир Найманов фестивальдинъ бас сахнасында Суьйимбийке акында, Регина Шамшидинова «Ногай халкыма» деген йырларды йырлап эситтирдилер. «Бет ашар» биювин «Кавказдынъ яны» деген биюв ансамбли оьнерли бийип коьрсетти. Фатима Мауш кызы Джалалова Салимет Майлыбаевадынъ Ана тилимиздинъ мутылып барувы акында ятлавын окып эситтирди. Ногайлар, конаклар, ердеслери уьшин онъайлы аьлди туьзбеге бек шалыстылар. «Авылга баргандай болдык» деген ясуьйкенлердинъ юрек туьбиннен алып айтылган соьзлери баьрине де савга эсабында болдылар. Фестивальдинъ баьри катнасувшылары да оьзлерининъ тыпаклыгын эм дослыгын коьрсеттилер. Бу енъил болмаган заманда сол зат бизим Элимиз уьшин уьйкен баалык болады. Ногайларымыз оьзлерининъ белсенлигин коьрсетуьви эм фестивальдинъ энъ ярык катнасувшылары болып эсте сакланганы да суьйиндирмей болмады. Сол аьлемет байрамы ман боьлиспеге эм онынъ оьтуьвине оьз демевлигин этпеге келген кайсы ногайга да разылыгымызды билдиремиз. Куьш-бирликте деп босына айтылмаган. Баска болып, ярасык каламыздынъ баьри яшавшылары уьшин ярык социаллык маьнеси болган шарадынъ баьри уйгынлавшыларына да уьйкен разылыгымызды билдиремиз, – деп белгилейди фестиваль акында Сургут каласынынъ Ногай яслар союзынынъ ваькиллери.
Э.Кожаева.
Суьвретте: шарадан коьринис.