Янъыларда Дагестан Язувшылар союзынынъ секретари, ногай секциясынынъ етекшиси, белгили шаир, язувшы, публицист Анвар-Бек Оьтей увылы Култаев Ногай районынынъ Россия Баьтири Алимхан Асанов атындагы Нариман авыл мектебинде конакта болды.
Бас деп ногай шаири мектеб окувшылары ман йолыгысты, олар алдында кызыклы хабарлары ман шыгып соьйледи. «Булытлар биюви», «Йигит яс» эм «Ногайстан улынынъ шуькирлиги» деген китаплерине оьз автографын салып, окувшыларга савкат эсабында тапшырды.

Сонъ Анвар-Бек Култаев йыйылганларга муннан 50 йыллар артта Нариман авылынынъ аты айтылган яшавшысы, ногай халкынынъ мактавлы увылы, «Данък» орденининъ толы иеси Алимхан Асановка багысланып язылган дестан язув уьстинде эткен аьрекети акында хабарлады, бу белгили аьдем мен байыр таныслыгы болганын эм неше кере де йолыгысканын белгиледи. Сонъ шаир Алимхан Асанов акында дестанынынъ бир уьзигин эм оьзининъ туьрли йылларда язган бир неше ятлавларын окып эситтирди. Йолыгыс барысында Анвар-Бек Култаев олимпиада чемпионы Альберт Батыргазиев акында дестан язып битиргенин билдирди эм онынъ да бир уьзигин йыйылганлар алдында окыды, А.Батыргазиев пен йолыгыс озгарганы акында айтты.
Соьйтип йолыгыс коьнъил коьтерилисте бек кызыклы болып оьтти.
Зухра Шугаипова.
Суьвретте: йолыгыс барысында.