Янъыларда Дагестан Республикасынынъ Орманлык хозяйство бойынша комитетининъ Ногай лесничествосында кенъес озгарылды. Онда ОНД эм ПР-9 Южносухокумск кала, Тарумов эм Ногай районлар бойынша тамада инспекторы А.Джамалутдинов, Ногай районнынъ администрациясында ГО эм ЧС эм мобилизациялык куллык бойынша бас специалист А.Ярлыкапов, от туьсуьвге карсы Терекли-Мектебтеги боьликтинъ куллыкшысы Э.Эльгайтаров, солай ок Ногай эм Червленные Буруны участок лесничестволарынынъ орманлык инспекторлары ортакшылык эттилер.
«Ногайское лесничество» ГКУ басшысы Ф.Дикинова айтканлай, Ногай район еринде «Ногайский район» МР администрациясынынъ аькимбасынынъ токтасына коьре 19-ншы июннен алып, от туьсуьвге карсы айырым аьл белгиленген.
От туьсуьвге кавыфлык бар аьл белгиленгеннен бери орманлыкларды саклав бойынша этилетаган куллыклар акында етекшидинъ орынбасары Р.Бакиев билдируьв этти. Онынъ соьзине коьре, от туьсуьвге карсы йолакларды янъыртув куллыклары тамамланады эм «Шоьл тавысы» газетасында от туьсуьв кавыфлыгы акында 4 макала баспаланган.
Сол ок куьн кенъес катнасувшылары от туьсуьвге карсы йолаклардынъ янъыртылувын эм от туьсуьвге карсылык этуьвге шакыратаган стендти карадылар.
