Ногай районынынъ Червленные Буруны авылынынъ больницасында, оьз аьрекетине толысынша берилип, эмлев исининъ сыхырлыгын аьруьв билетаган аьдемлер куллык этедилер.
Янъыларда мага бир неше аьдем сырасында бу эмлев ошагында ден савлыгымды бираз беркитпеге туьсти. Врач Гульнара Айнадиновна Алиева етекшилиги астында куллык этетаган тыпак коллектив оьз борышларын йогары дережеде ак ниети мен юритетаганы сезилмей болмады. Йогары билимлиги, кеспи усталыгы ман ис йолдасларына уьлги болган врач-кыскаяклы оьз аьрекетин ак юреги мен юритеди. Янъыларда бизим арамызда вакцинация процедурасынынъ пайдалыгы акында терениннен анълатув ман кызыклы хабарласув да озгарды.
«Асынъды бермесенъ де, касынъды бер» дегенлей, ол оьз танълыгы ман аьр авырыган аьдемнинъ ян тоьрине ашкыш тавып, маразды енъмеге болатаганына ынандырады, аьрисине айырым соьзлер тавып, ясуьйкенге кол созады, ясы кишкейге йол коьрсетеди. Оьз коллективи мен бирге ол кеше демей, куьндиз демей, авырыган аьдемге оьз ягыннан ярдамын тийгистпеге аьзирликте турады. «Больница – меним экинши уьйим», – дейди врач-кыскаяклы куьлемсиреп.
Уьйкен сый-оьрмет пен пайдаланады Гульнара Айнадиновна оьз аьелинде де алал косак, коьримли ана эсабында. Онынъ яшав куьези – суьйикли балалары: элимиздинъ бас каласы Москвада йогары окув ошагында билимин арттыратаган кедеси Марат, мектебте окып, оьз уьстинликлери мен ата-анасын суьйиндиретаган кедеси Артур эм юрек тоьринде куваныш тувдыратаган ерли балалар бавынынъ тербиялавшысы, яныннан аявлы кызы.
Врач Гульнара Айнадиновнага эм онынъ басшылыгы ман авыл яшавшыларынынъ савлыгын саклав ман каьрлевши ак ниетли эмлевши коллективке юрек туьбиннен оьз разылыгымызды билдиремиз. Яшавымызга сенимли аяк басып кирген Янъы 2022-нши йылы ман ак юректен алгыслаймыз, берк ден савлык, узак яшав оьмирин, ис уьстинликлерин йораймыз. Коьп савбол айтамыз.
Куьнбатар, Батыр-Мурза, Аневский эм баска авылларынынъ яшавшылары: Сайлав Отарова, Сафура Ярикова, Разият Акмурзаева, Юмазиет Койлубаева, Назира Арыкова, Алтын Дуйсенбиева, Кумбийке Муталимова, Дамир Муслимов, Тунгатар Аманбаев, Юлманбетова.
