Быйыл коькек айынынъ 4-нши куьнинде белгили суьвретшимиз, Дагестан Республикасынынъ ат казанган саниятлар аьрекетшиси, шаир, халк авызлама яратувшылыгы ман терен каьрлевши, уста кийим тигуьвши, биювши Сраждин Самедин увылы Батыров 70 ясына толаяк эди.

Соны ман байланыста Махачкала каласында коькек айынынъ 2-нши куьнинде ДР Тахо-Годи атындагы Миллет музейи Дагестан Республикасынынъ Суьвретшилер союзынынъ выставкалар залында Сраждин Батыровтынъ суьвретлерининъ выставкасын уйгынлайды. Коьплеген йыллар белгили суьвретшимиздинъ ислерин онынъ йолдасы Алтын Омирзак кызы Акбердиева саклаган. Сраждин Батыровтынъ яратувшылыгын яс несилге еткеруьв исине уьйкен уьлисти искусствовед Татьяна Павел кызы Петенина коскан. Сраждин Батыровтынъ коьплеген ислерин йыйнаган эм кайтадан ярастырган онынъ тул хатыны Аклия Шадмуратова эм кызы Айбике-Виктория. Суьвретшидинъ суьвретлерин Мухтар Гаджинаев, Екатерина Кониковска, Эдуард Агаларов ярастырганлар. Сраждин Батыровка багысланган шараларды озгарув ислеринде Ногай районынынъ администрациясы белсен катнасады. Суьвретшидинъ асарларын ярастырувга администрация ман акша шыгарылган. Солай ок выставкады уйгынлавда Дагестан Республикасынынъ маданият министерствосы, П.Гамзатова атындагы ИЗО музейи, ногай аьдет маданиятын янландырув эм саклав фонды катнастылар.
Сраждин Батыровтынъ фондынынъ директоры А.Бакиев Грозный каласында «Вайнах» ансамблининъ катнасувы ман шара озгараяк.
Махачкала каласында выставка 10 куьн юритилеек. Сонъында выставка Ногай районынынъ орталыгы Терекли-Мектебте оьтеек.