Элимиз бойынша буьгуьнлерде юритилип турган патшалык социаллык газификация программасы ал деп халк яшавын ийгилендируьвге каратылган яваплы ислердинъ бириси болады. Сонынъ акында Ногай районынынъ Ямагат палатасынынъ председатели Эльмурза Саитов оьз ойы ман боьлиседи.

– Былтыр 18-нши октябрьден алып Россия Президенти Владимир Путиннинъ аьрекети мен патшалык социаллык газификация программасы яшавга киритилип басланган. Элимиздинъ, сонынъ санында районымыздынъ яшавшылары уьшин бу программадынъ пайдасы кайдай? Сол программага коьре, газ тармаклары бар болган авыллардагы кайдай да бир себеплерден тура ер участокларына дейим газ еткерилмеген яшавшылардынъ азбарларына дейим газ тегин кепте еткерилмеге каралады. Элбетте, сондай аьдемлердинъ коьбиси оьз ер участокларына дейим газ еткермеге амалы болмаган мадарсыз, ялгыз яшайтаган карт, коьп балалы аьеллер боладылар. Сол себептен сондай гражданларга бу программа патшалык ягыннан этилинип турган уьйкен социаллык ярдамы болады.
Оькиметтинъ мундай каьр шегуьви аркасы ман авыл аьдемлерининъ яшав аьллери ийгилинеек, олардынъ уьйлерине йылувлык, онъайлык келеек, коьп акша шыктажлап агаш эм коьмир сатып алмага керекпеек эм ол зат аьлиги енъил болмаган заманларда бек маьнели. Патшалык социаллык газификация программасы бойынша аьли элимизде 100 мынънан артык, республикада болса, 100-ден артык яшавшылардынъ уьйлери газ тармакларына косылган. Сонынъ уьшин газификацияланган авыл ерлериндеги уьйлери газ тармагына косылмаган авылдаслар районнынъ ЭГС-не, авыл администрацияларына, МФЦ-ге яде госуслуги аркасы ман белсенли кепте аьризелер эм керекли документлерин аьзирлеп бермеге тийисли, – деди «Шоьл тавысы» республикалык газетасынынъ хабаршысына Эльмурза Саитов.