Кизляр районынынъ администрациясында от туьсуьв кавыфсызлыгын канагатлав эм аьдеттен тыскары аьлди тайдырув эм онынъ алдын шалув бойынша Комиссия йыйыны уйгынланып оьтти.
Комиссия билимлендируьв ошакларынынъ эм савлыкты саклав объектлерининъ пеш ягылув шагына, Кизляр районынынъ белгиленген заманына паспортынынъ аьзирлиги эм куьз-кыс шагына от туьсуьв кавыфсызлыгын канагатлав бойынша амаллары акында соравларын коьтерди. Кизляр район аькимбасынынъ биринши орынбасары Тимур Гаирбеков турак-коммуналлык хозяйстволарынынъ алдыда пеш ягылув шагына аьзирлиги, солай болып, 2021-нши йылдынъ курал айынынъ 12-нши куьнинде Дагестан Аькимбасы Сергей Меликовтынъ катнасувы ман оьткен йыйында социаллык объектлерин йылувлык пан канагатламага деген негизли маьнеси болган токтаслары толтырылув бойынша озгарылганы акында белгиледи. Курылыс эм турак-коммуналлык хозяйство управлениесининъ етекшиси Гусейн Нажмудинов уьш орта мектеблеринде йылувлык тармагын ярастырув бойынша, баска болып, 11 авыл ерлеринде орынласкан 63 турак коьп квартиралы уьйлеринде пеш ягылув шагына аьзирлик коьрилуьви бойынша этилинген ислер акында эсап берди. Билимлендируьв управлениесининъ етекшисининъ ис аьрекетин кесек заманга юритуьвши Дмитрий Бабенко билимлендируьв ошакларына 11 пеш ягув котелларын алувга, ягув тармагын ярастырувга карыжланган акша амаллары акында билдируьвлерин этти. Онынъ соьзи мен котельныйдынъ 203 операторлары уьйретилген деген шайытламасын алганлар. Оннан баска болып, Ростехнадзор органлары ман озгарылган тергевлерининъ тамамы бойынша, 2021-2022-нши йылларга билимлендируьв ошакларынынъ пеш ягылув шагына аьзирлиги акында акт берилген. Баска болып, озгарылган иси эм медициналык ошакларынынъ алдыда пеш ягув куьз-кыс шагына толысынша аьзирлиги акында район орталык больницасынынъ бас врачынынъ куллыгын кесек заманга юритуьвши Анатолий Талибов доклады ман шыгып соьйледи.
Бузлавыкка карсы аьзирлеген материалы, айырым техникадынъ аьзирлиги акында «Кизлярское ДЭП-20» организациясынынъ бас етекшиси Юсуп Юсупов билдируьв этти.
Комиссия председатели, Кизляр район администрациясынынъ мобилизация, ЧС эм ГО ислери бойынша боьлигининъ етекшиси Степан Свиридович куьз-кыс мезгилине от ягув шагынынъ озгарылувы бойынша шаралардынъ яваплы толтырылувы акында эске салды.
Йыйыннынъ тамамы бойынша Комиссия ман тийисли токтаслары алындылар.
