Янъыларда республика етекшиси Сергей Меликов журналистлер мен хабарласувында Дагестаннынъ экономика тармагы алдында тувган маьселелер эм оларды шешуьв мен байланыста кайдай аьрекет юритилетаганы, яшавга шыгарылмага каралатаган кайдай планлар туьзилгени акында айтты. Онынъ белгилеви мен, Дагестаннынъ промышленность предприятиелеринде, тыскы санкцияларга карамастан, болдырылатаган производство оьлшемин туьсирмеске эп бар, боьтен де, айтпага, коршаланув тармакта керексинуьвлерди эсапка алув ман заказлар саны артканы себеплигин тийгистти. Белгилеви сол: Дагестанда аьзир продукция болдырылмайды, мундагы предприятиелерде оборудованиединъ айырым бириктиретаган алатлары шыгарылады.
Ама санкциялар ман байланыста, аз болса да, кайбир маьселелер орын тапты. Мысалы, кубыла Дагестанда агропром предприятиелер уьшин майданларды уьйкен оьлшеминде оьрлендируьв мен бирге продукцияды саклав, бузлатув эм асыллав уьшин объектлер курылысы планланган. Бас деп Европадан еткерилмеге керек оборудование эсапка алынган эди. Эм бу ерде сонынъ орынына оборудование табувга айырым заман керекти.
Регион етекшиси солай ок Дагестан еринде мол оьлшеминде малшылык продукциясы болдырылатаганын, ама толысынша асылланып болмайтаганын белгиледи. Сонынъ уьшин бу маьселеди шешуьв уьшин быйыл Кизляр районында эт продукциясын асыллайтаган предприятие курылысы басланганын билдирди.
Сондай маьселе, Дагестан етекшиси билдиргенлей, орын табады ясылшалар эм емислер оьстируьв тармагында да. Айтпага, республикамыз еринде экология ягыннан таза куьреге эм шабдал (персик) оьстирилип, уьйкен оьлшемде онъыс йыйылады, ама оны асыллавшы предприятиелер етиспейди. Сонынъ уьшин келеекте уьйкен производство-логистический предприятиелер курылысы планланган. Суьт продукциясын болдырувда да сондай аьл. Байыр кепте суьт продукциясы асылланады, базарда алмага суьйген баьри зат та, сонынъ ишинде аьлемет дагестан пыслаклар да, бар. Ама Сергей Меликовтынъ ниети – бу баьри тармак продукциясын промышленность оьлшеминде оьстируьвге эм асыллавга айландырув.
Любовь Уразаева,
Россия Журналистлер Союзынынъ агзасы.
