Эртеректе билдирилгенлей, Дагестан Аькимбасы Сергей Меликов оьткен юма ДР Оькиметининъ Председатели Абдулпатах Амирхановтынъ оьз ыхтыяры ман куллыгыннан таювын кабыл эткен эм онынъ исин кесек заманга юритуьв борышын Абдулмуслим Абдулмуслимовка тапшырган. Сол куьн ок ол Дагестан Оькиметининъ Председателининъ ис орынына Абдулмуслимовтынъ кандидатурасын ойласып каранъыз деп ДР Халк Йыйынына маслагат эткен. Соны ман байланыста газетамыздынъ эксперти Магомет-Али Ханов оьз ойы ман боьлиседи.

– Абдулмуслим Абдулмуслимовты биз ал деп авыл хозяйство яктан билимли эм сулыплы специалист деп таныймыз. Ол орта мектебти окып биткен сонъ Москвадагы К.А.Тимирязев атындагы авыл хозяйство академиясын, оннан сонъ Россельхозакадемиясынынъ аспирантурасын окып кутарган эм авыл хозяйство илмилеринъ кандидаты деген аьлим дережесин алган. Хыйлы йыллар зоотехник, бас зоотехник, «Дельта» АО толтырувшы директоры эм баска яваплы ис орынларында куллык эткен.

Абдулмуслимов регионнынъ авыл хозяйство тармагынынъ бас маьселелерин бек аьруьв биледи (ол оьзи ДР Авыл хозяйство эм тамак азык министри болып ислеген), неге десе аграрлык тармагы Дагестан экономикасынынъ негизи болып саналады.

Абдулмуслим Абдулмуслимов Кизляр отлакларынынъ, сонынъ санында Ногай районынынъ ерлерининъ кумланувынынъ маьселесин де ийги биледи. Ол оьзи республика оькиметининъ делегациясы эсабында бизим районга келген. Сол куьн район администрациясында болып оьткен йыйында ол республикадынъ Сырт зонасындагы бизим эм баска районлардынъ ерлерининъ кумланып барувы токтатылаяк, Россия Оькимети мен Дагестан Оькимети бизим ерлерди яшавга кайтарув, солардагы мал санын нормага келтируьв уьшин баьри амалларды да коьреек деп белгилеген.

Республика парламентининъ депутатлары ДР Оькиметининъ Председателининъ ис орынына Абдулмуслим Абдулмуслимовтынъ кандидатурасын беркитуьв акында Дагестан Аькимбасынынъ маслагатын макул коьрерлер эм ол регионымыздынъ социал-экономикалык оьрленуьв йолындагы маьнели маьселелерди шешуьвге баьри куьшин салар деп сенемиз, – деген Магомет-Али Ханов.