Йыл сайын 26-ншы июльде биз республикадынъ бас байрамы – Дагестан Конституциясынынъ куьнин белгилеймиз. Сол куьн 1994-нши йылда Конституция Йыйыны янъы Конституцияды кабыл этип алган, 26-ншы июльди Дагестан Республикасынынъ Конституция куьни деп белгилеген эм сол куьн ортак миллет байрамы деп тарихке кирген.
Республикадынъ янъы Конституциясын кабыл этуьв коьп миллетли дагестан халкынынъ патшалыгын, демократияды эм ыхтыярлар патшалыгын туьзуьвде эм оьрлентуьвде маьнели абыт болган. Проектти аьзирлевде ДР Оьр Советининъ Конституционлык комиссиясынынъ, ДР Оькиметининъ, исши туьркимининъ агзалары куллык эткенлер. Олардынъ сырасында белгили аьлимлер, правоведлер, йогары усталыгы болган юристлер ислегенлер. Конституция коьпмиллетли Дагестанда тынышлыкты эм бирликти, политикалык эм экономикалык эмишликти сакламага уьйкен косымын эткен. Бизим Конституциядынъ тек Дагестанга келисли аьлемет миллет баскалыклары да бар эди.
1994-нши йылда алынган Конституциядан сонъ Дагестаннынъ эм Россиядынъ ямагат-политикалык яшавында уьйкен туьрленислер болдылар. Оьрленуьвдинъ коьшпели заман кесеги кутылды. Соны ман байланыста 2003-нши йылдынъ 10-ншы июлинде Дагестан Республикасынынъ янъы Конституциясы кабыл этилинип алынады. Аьлиги замандагы аьллерге эм РФ-сында ортак бир ыхтыяр майданын канагатлав принциплерине коьре, ДР Конституциясынынъ янъы политика-ыхтыяр положениелери деп Дагестан Республикасынынъ толтырувшы власть органын басшылайтаган оьр инсаннынъ ис орынын киргистуьв эм ДР законодательлик органын кеплендируьвдинъ йорыгынынъ туьрленуьви саналады. Барганнан-барган сайын иркуьвсиз аьлде биз федераллык эм республикалык законодательствосын оьрленттик, федераллык нормативли актларына келиспейтаган положениелерди тайдырдык. Сонынъ нормалары эм баалыклары аьр бир дагестанлыга белгили эм анъламлы болмага керек.
Оьз республикамызды биз тек оьз ыхтыярларымыз эм эркинликлеримизге аявлы кепте каравымыз бан, коьпмиллетли Россиядынъ айырылмас кесеги деп саналатаган коьпмиллетли дагестан халкынынъ кызыксынувларына яваплайтаган шынты демократиядынъ принциплерине алаллыгымызды саклавымыз бан шешекейлендирмеге боламыз.
Дагестан Республикасынынъ Конституция куьни – республикамыздынъ бас байрамы ман газетамыздынъ аьр бир окувшысын, аьр бир ердесимизди, баьри дагестан халкын кутлаймыз. Асыл Законымызда белгиленген аьр бир пункт пан келисли кепте яшап эм ислеп республикамызды эм халкымызды янъы оьрленуьв бийиклевлерине еткерейик!
