«Россия халкларынынъ ассамблеясы» деген Савлайроссиялык ямагат-патшалык организациясынынъ председатели, Россия Федерациясынынъ Федераллык Йыйынынынъ Государстволык Думасы бойынша «Единая Россия» фракциясынынъ етекшиси Владимир Абдуалиевич Васильев Россия Федерация Президентининъ Администрациясынынъ майданында 2023-нши йылдынъ биргелес планларына эм Ассамблея тизимине организациялардынъ кируьви бойынша соравларына багысланган федераллык миллет-маданият автономиялардынъ етекшилери мен йолыгыс озгарды.
«Буьгуьнлерде ортак борышларды шешуьвде бирлесуьв бек маьнели. Федераллык миллет-маданият автономиялары миллетлер ара макулласувлыкты канагатлавда, Россия халкларынынъ маданиятларын эм аьдетли баалыкларын саклав бойынша тармаклык исин юритедилер. Сизинъ аьрекетинъиз – патшалыктынъ миллет политикасынынъ маьнели кесеги болады. Савлай элимиз бойынша ийги ис сулыплары яйылганы бек керек. Буьгуьнлерде коьпмиллетлик халкымыздынъ бирлигине эм ортакроссиялык гражданлык уйкаслыгын беркитуьвине, Элимиздинъ коршалавына каратылган Россия халкларынынъ куватына демевлик этуьв – бек маьнели. Бу зат «Россия халкларынынъ ассамблеясы» деген Савлайроссиялык ямагат-патшалык организациясынынъ негизли борышы болады», – деди Владимир Васильев.
Баьри йолыгыс катнасувшылары да бир тавыстан ямагат-патшалык Ассамблеясына кируьви мен кабыл болатаганын билдирдилер. «Биз бирге Ассамблея байрагы астында элимиздинъ халклар ара бирлигин боьлмеге суьетаган деструктивли куьшлерине карсы турмага болаякпыз», – деп белгиледи Россия ногайларынынъ Федераллык миллет-маданият автономиясынынъ йогары советининъ председатели Валерий Сеперович Казаков. Шыгып соьйлегенлер Ассамблея ман озгарылган маьнели проектлеринде, айтпага, Сталинград урысынынъ 80 йыллыгына багысланып Волгоград каласында оьткен патриотлык шарасында эм «Сенеж» деген Мастерской управлениесинде оьткен савлайроссиялык семинарында ортакшылык эткенлери уьшин разылыгын билдирдилер. Кенъеслери мен авысув тамамлары бойынша уьстимиздеги йыл ишинде Россия халклар ассамблеядынъ биргелес куллыгын уйгынлавда миллет-маданият автономиясынынъ проектлик исиндеги болган ийги сулыбына таянмага деген шакырув этилди.
Суьвретте: россия ногайларынынъ Федераллык миллет-маданият автономиясынынъ йогары советининъ председатели Валерий Казаков шара катнасувшылары ман.