Россия Президенти Владимир Владимирович Путин Донбасста айырым аьскершилик операциясы басланувы акында билдирген. Патшалыгымыздынъ етекшисининъ сондай карарын дурыс ойланган эм оьз негизи бар карар деп санайман. Сол карар, бириншилей, элимиздинъ босагасы алдында туьзилген навасыз аьллер мен байланыслы. Сол ок заманда биз марионеткалы киев режими ягыннан ДНР эм ЛНР яшавшыларына карсы юритилетаган эзиетлерине эм коьпйыллык корлыкларына сабыр кепте карап болмаймыз. Аьдемлер оьзлери, оьз балалары уьшин парахатлы эм келеектегиси болган яшавдынъ болганын суьедилер, тек Россия беттен коьмексиз олар сол ниетлерине етисип болмаяклар.

Бизим планларымызда Украинадынъ эм украин халкынынъ кызыксынувларын кемитуьв деген зат белгиленмеген, ама биз оьзимиз кавыфсыз аьллерде болмага суьемиз. Болса да туваяткан урысувларды тынышлы аьллерде шешпеге деген баьри ымтылувларымыз да, оькинишке, пайдасыз болып калады. Патшалыгымыздынъ етекшиси тувра кепте билдиргенлей, биз эндигиден армаган куьтип эм карап олтырмага болмаймыз. Мен сенемен, Россия кардаш патшалыгында тынышлыкты демевлев бойынша оьз миссиясын толтырар. Бизде керекли согыс савыты эм энъ маьнелиси – бизим ортак уьйимизди коршалав бойынша оьз борышын йигитлерше толтырмага аьзир болган шынты патриотлар бар.
Сыйлы йолдаслар! Туьзилген аьл парахатлы эм бизим тергевимиз астында, властьтинъ баьри республикалык органлары да планга киргистилген шараларды властьтинъ федераллык оьлшеми мен бирге тегислеп, оьз йорыгы ман ислеп турадылар. Сизди де сабырлыкты эм шыдамлыкты тутпага шакыраман, – деп айтылады Дагестан Аькимбасы Сергей Меликовтынъ шакырувында.