Ногай район орталык полик-линикасында, уьстимиздеги йылдынъ канътар айынынъ ызгы куьнлериннен алып, коронавируслы маразга карсы вакцинация этуьв пункты аьрекет этип баслаган. Тезден вакцинадынъ биринши кесеги бизге келеек.

Соны ман байланыслы болып, Ногай район администрациясындагы ямагат палатасынынъ председатели Эльмурза Саитов район яшавшыларын коронавируслы маразга карсы прививка этпеге шакырады.

– СМИ тармаклары билдиргенлей, энди коронавируслы маразга карсы прививкады мырады бар баьри аьдемлер де эттирмеге боладылар. Мен район гражданларын зарарлы маразга карсы прививкады эттирмеге маслагатымды беремен. Эсимизге ала- йык эм статистикалы билдируьв- лерди алып карайык, не шаклы аьдемлеримизди, ювыкларымызды йойдык, неше юзлеген аьдемлер сол кавыфлы мараз бан авырыдылар. Янъыларда Ногай район орталык больницадынъ етекшиси билдиргенлей, янъы йылдынъ басланувы ман районымызда сол мараздан эки аьдем оьлди эм онлаган аьдемлерде мараздынъ бары аянланды, аьли де эмленуьв тармагында авырувлылар бар. Аьллер енъиллерден тувыл, сонынъ уьшин, оьз яшав оьмиримизди саклар ниет пен, маразга карсы прививкады эттирмеге керекпиз. Вакцинация этеектен алдын баьри тийисли тергевлерди де оьтпеге керекпиз. Оьз яшавшыларынынъ ден савлыгын саклар ниет пен, вакцинады аьзирлев уьшин патшалык аз карыж шыгармаган. Солай болганда, патшалык бизим акымызда ойлаганда, биз оьзимиздинъ акымызда неге ойлап болмаймыз? – дейди Эльмурза Саитов.
Ызгы заманларда республикамыз бойынша 1000 артык аьдем коронавируслы маразга карсы прививка эттиргенлер. Дагестан Республикасы бойынша коронавируслы маразга карсы прививка эттируьв уьшин 54 пункт ашылган, 10 ерлерине барып этетаган мобильли пунктлар да бар, патшалык буйымларды толтырувшы порталында электронлы кепте шеретке язылмага боласыз.