ДАССР курылганлы 100 йыл толувы ман байланыслы болып, район орталыгымыздынъ билимлендируьв учреждениелеринде, маданият тармагында коьп шаралар озгарылдылар.

ДАССР курылганлы 100 йыллык мереке белгиленуьви ишинде, Ямагат яратувшылык орталыгынынъ методикалык кабинетининъ куллыкшысы Нина Темирбек кызы Халиловадынъ етекшилеви астында, Ногай районынынъ авыл ерлериндеги маданият уьйлери оьз авылларынынъ белгили аьдемлерининъ акында билдируьвлер салып, суьвретлер альбомларын аьзирледилер.
Аьзирленген альбомлардынъ аьр бириси оьз алдына кызыклы. Солардынъ ишинде энъ де ийгилери: Куьнбатар, Ленинаул, Кумлы, Эдиге, Бораншы авыл маданият уьйлерининъ куллыкшылары аьзирлеген суьвретлер альбомлары боладылар. Олардынъ аьр бириси оьз авылында тувып-оьскен, ДАССР тарихинде бир орын алган ердесин коьрсетпеге шалыскан. Сол альбомларда район, республикадынъ бир дережели ис орынында олтырган аьдемнен алып кара куллыкларда ислеп, экономикалык аьллердинъ ийгиленуьвине себеплик эткен аьдемлердинъ акында да билдируьвлер бар.
Нина Темирбек кызы Халиловадынъ билдируьвине коьре, авыл маданият уьйлерининъ куллыкшылары бу шарага бек уьйкен маьне берип, аьзирленгенлер.
Ногай районындагы Ямагат яратувшылык орталыгынынъ методикалык кабинетининъ етекшиси Нина Халилова оьзи де ДАССР-дынъ 100 йыллык мерекесине багысланган там газетасын аьзирлеген. Бу газетага район орталыгынынъ тарихинде айырым орынды алатаган оьзгерислерден суьвретлер киргенлер.
Г.Курганова.
Суьвретте: Н.Халилова оьзи аьзирлеген там газетасы ман таныстырады.