Уьстимиздеги 2020-ншы йылда элимизде 9-ншы класс окувшылары аттестат алар уьшин, тек эки парызлы сынав бермеге боладылар.
Бас оькимет сынавларын 9-ншы классларда эки парызлы сабаклардан, орыс тилиннен эм эсаптан бермеге каралады. Оьз эрки мен сайлап алынатаган эки сынав берилмеске болады.
Бу туьрленислер коронавируслы юкпалы маразы яйылмас ниетте киргистиледилер. 9-ншы класстынъ окувшыларынынъ саны 11-нши класс окувшыларыннан 2 кайта артады, сога коьре де сынавларды беретаганлардынъ саны тенълестириледи. Баьриси бу йыл 1,4 миллионнан артык окувшы ОГЭ сынавлардан оьтпеге тийислилер.
Элимиздинъ аьр бир регионы, ондагы эпидемиологиялык аьлге коьре, 9-ншы класс окувшыларына ОГЭ оьтеек куьнлерди сайлаяклар. Сынавлар окув йылы тамамлаганнан сонъ озгарылаяк. Оннан оьзгелей, 9-ншы класс окувшылары ОГЭ-ди оьзлери окыйтаган мектеблердинъ негизинде берееклер.
Дагестан Республикасында ОГЭ бермеге 35 мынъ окувшыга аьризе берилген. Аттестация басланувы тамбыз айдынъ 9-ншы куьнине коьширилген.
11-нши класс окувшыларына Ортак бир патшалык сынавларыннан (ЕГЭ) оьтуьвде берилеек сабак- лар саны туьрленмеген. ЕГЭ озгарувдынъ тек куьнлери туьрленген.
ОГЭ эм ЕГЭ сынавлардынъ дистанционный кебинде берилуьви каралмайды. Окувшыларга бу куьнлерде болаяк сынавларга уьйинде аьзирленмеге туьседи.
Дагестан Республикасынынъ уьйкен класслар окувшылары «Открытая онлайн-школа» проектинде катнасаяклар. Проект бойынша сынамалык (пробный) ЕГЭ эм ОГЭ дистанционлы кебинде болаяк. Сынамалык экзаменлер уьстимиздеги айдынъ ишинде уйгынланаяк деп, Дагестан Республикасынынъ Билимлендируьв эм илми министерствосы билдиреди.
