«Баладынъ баласы балдан таьтли» деп айтылады ногай халкымызда. Кашан да, бу соьзлер мен баьри атай-тетейлер макул болар. Соьйтип, Акберди эм Азинет Башиевлер кишкей уныгы Даниялдынъ уьстинликлерине куьезленип турадылар.
Даниял – Терекли-Мектеб авылынынъ А-Х.Джанибеков атындагы мектебининъ 1-нши «в» классынынъ окувшысы. Ол «Ногай Эл» балалар бавына юретаган эди, сонда болатаган шараларда, конкурсларда катнасып, баргылы орынларга тийисли болган. 2021-нши йылда Даниял Башиев Ана куьнине багысланган муниципаллык конкурсында катнасып, биринши орынды алган. «Энъ де ярасык колдан этилген янъы йыл иси» деген суьвретлер конкурсында ортакшылык этип, 3-нши орынга тийисли болган. Даниял «Атам объективте» деген район бойынша конкурсында катнасып, Ногай районынынъ Хатын-кызлар советининъ председатели А.Манкаевадынъ атыннан грамота алган.
Мектебте де Даниял туьрли шараларда ортакшылык этеди, конкурсларда енъуьвши болады. Янъыларда ол уллы шаири Расул Гамзатовтынъ 100 йыллыгына багысланган ДР ГБУ «Дагестан» РГВК ман уйгынланган шаирлик конкурсында катнасып, диплом алган. Даниял «Футбол – меним суьйикли спорт ойыным» деп аталган мектеб суьвретлер конкурсында 2-нши орынга тийисли болды. Ата-анасы Рустам эм Альбина Башиевлер бек суьйинедилер Даниялдынъ енъуьвлерине, кишкей карындасы Ясмина акасыннан коьрим алады эм мектебте тек бесевлерге окыякпан деп айтады.
– Даниял окымага суьеди, онынъ окытувшысы Назира Будайхан кызы Янибекова, ол саьбийлерди бек ийги этип уьйретеди, балалар кызыксынып, окыйдылар. Даниял доктор болмага суьеди, ийги эмлевши болар уьшин аьруьв этип окымага керегин анълайды. Ол китаплер окымага суьеди, пластилин мен ислейди, – деп хабарлайды увылы акында Альбина Башиева.
Биз Даниялга алдыда аьли де коьп уьстинликлер йораймыз.
Г.Бекмуратова
Суьвретте: Д.Башиев.