Оьткен юма Дагестан Аькимбасынынъ куллыгын юритуьвши Сергей Меликов коронавирус юкпалы маразы ман куьрес юритуьв бойынша республикалык Оперативлик штабынынъ йыйынын оьткерген сонъ, солай ок ДР бойынша Роспотребнадзор етекшиси Лариса Пантинадынъ эм ДР савлык саклав министрининъ 1-нши орынбасары Татьяна Беляевадынъ брифингиннен сонъ, Ногай район имамлар советининъ председатели Алиасхаб Танаев район яшавшыларына шакырув эткен.

– Республикада коронавирус юкпалы маразынынъ яйылып басланувы ман бирге биз бир саьатке де токтамай, «Шоьл тавысы» республикалык газетасы, ерли радиодынъ аркасы ман уьйде олтырув, маскалар киюв эм меканларды дезинфекциялав йорыкларын тутув акында халк арасында анълатув куллыкларын юриттик. Соны ман бирге биз куьн сайын район межигитлерининъ ишлерин дезинфекциялав ислерин оьткерип келемиз. Оьлгенлерди йоклав шараларында катнаскан яшавшылардынъ санитар-тазалык йорык-ларды тутувын тергедик.
Болса да, оькинишке, коронавирус пан байланыслы аьллер эндиги де авыр болып калады. Сонынъ акында оьткен юма Дагестан Аькимбасынынъ куллыгын юритуьвши Сергей Меликовтынъ етекшилиги мен оьткерилген республикалык Оперативлик штабынынъ йыйынында да айтылып белгиленген.
Соны ман байланыста биз район яшавшыларын оьлгенлерди эскеруьв дувасларына коьлем болып йыйылманъыз деп шакырамыз. Солай ок намазларды да коьп болып йыйылып кылманъыз деп маслагат этемиз.
Мен солай ок халкымызга мерекелерди оьткеруьвди де коймага кенъес этемен, неге десе сол зат, ют маразы кутырган заманда, той эткенге усагандай болады. Аьр юма сайын коронавирустан тура биз оьз ердеслеримизди йойып турамыз. Сол зат бизди сак болмага шакырады, неге десе авырув бизим янымызда юреди, уьйлеримизде болса ясуьйкен ата-аналарымыз бар, эгер оларга мараз юкса, соны коьтерип болмаяклар.
Биз, район дин аьрекетшилери, Ногай районынынъ баьри де яшавшыларына тийисли йорыкларды тутайык, соьйтип биз оьзимиздинъ кардаш-тувганларымызды юкпалы мараздан сакламага болармыз деп шакырув этемиз, – деген Ногай район имамлар советининъ председатели Алиасхаб Танаев.