Янъыларда Дагестан Республикасында коронавируслы маразга карсы турув эм соны бизим япсарга аькелдирмес уьшин туьзилген оперативли штабтынъ йыйыны болып озды. Йыйында Дагестан Республикасынынъ Аькимбасынынъ кесек заманга куллыгын юритуьвши Сергей Меликов та ортакшылык этти. Бу куьн олар бизде эпидемиологиялык аьл акында соьз коьтердилер.

– Бу зарарлы маразды енъуьв уьшин бизге вакцинация этпеге керек болады, неге десе сол соравдынъ бек уьйкен маьнеси бар. Вакцинация этпеген аьдем келеекте аьжиликке, халклар ара оьткерилетаган шараларда эм баска эллерге тыншаймага барып та болмаяк, – деди республика басы. Солай ок йыйылганлар Сергей Меликовтынъ соьзиннен вакцинадынъ ийги пайдасы бар экенин де билдилер.
– Муннан бир куьн алдын болып озган, вакцинация соравы уьстиндеги йыйында Россия Федерациясынынъ Президенти Владимир Путин россия вакцинасын 55 эллерге йибергени акында билдирди, – деди ол.
Бу куьнлерде республикада аьллер ийгилерден тувыл, сога коьре бизге «телбегеди» йибермеге аьли де эрте.
Йыйыннынъ барысында Дагестан Республикасынынъ Аькимбасынынъ кесек заманга куллыгын юритуьвши Сергей Меликов Савда эм промышленность министри Низам Халиловка эм Дагестан Республикасындагы предпринимательлердинъ ыхтыярларын коршалав бойынша уполномоченныйы Мурад Далгатов пан, ямагат эм бизнес ваькиллери мен тийисли йорыкларды тутып болаяк болса, банкет залларды аштырув уьстинде соьйлемеге борыш берилди.
Алдымызда – Ораза айы, соны ман байланыслы болып, ямагат тамакланув организациялары ашылмага ыхтыяр берилетаганы акында да йыйында билдирилди, ама олар баьри тийисли шартларды да тутпага кереклер.