Коьптен, совет заманларыннан алып, кайсы оькимет организациясында да коьзге илинмейтаган, ама пайдалы аьрекетин бардырып келген профсоюз комитетлери бар. Профсоюз исши аьдемге сенимли яклавшы болып, белсенлик пен оьз аьрекетин бардырады.
Бар сондай профсоюз организациясы районымыздынъ Эдиге авыл ерли мектебинде де. Мине 10 йыллар узагында оны окытувшы Зухра Менглиахмедовна Аджиева басшылайды. Асылы ман бу кыскаяклы – Куьнбатар авылыннан. Ерли мектебти окып битиргеннен сонъ, ол Махачкаладагы педагогикалык университетине окымага туьседи эм сырагысында сыйлы окытувшы кесписин байырлайды, эм яс окытувшыга Эдиге авыл мектебинде эсап беруьв эм физика окув сабаклары бойынша балаларга билим беруьв борышы тапшырылады.
Суьйикли исине толысынша коьмилип, балаларды окытувга эм тербиялавга куьш-куватлыгын аямай бардырады ол оьзининъ окытувшылык аьрекетин.
Яс кыскаяклы бу авылда оьзине ян косак тавып, уьйли-эсикли де болады.
Буьгуьнлерде Зухра Менглиахмедовна авылда абырайлы инсанлардынъ бириси эм ерли мектеб куллыкшылары арасында уьйкен сый-оьрмет пен пайдаланатаган окытувшы. 2012-нши йылда мектеб коллективи Зухра Менглиахмедовнады бир тавыстан ерли профсоюз комитетининъ етекшиси этип айырады, эм мине соннан алып окытувшы кыскаяклы бу ямагат исти яваплылык пан толтырып келеди.
– Окув йылдынъ басында профсоюз комитетининъ планын туьземиз эм кенъесимизде беркитемиз. Йыл узагында, тувган маьселелер бойынша оьз ой-токтасларымыз бан боьлисип, оларды шешуьвдинъ йолларын излестирип, комитеттинъ кенъесин озгарамыз. Комитеттинъ доьрт боьлиги бар, аьрисининъ яшавга шыгарылмага керек оьз борышлары бар. Туьрли мерекелер мен, байрамлар ман, яй шаклары ман байланыслы мезгиллерде окытувшылардынъ кызыклы амалламалар уйгынлап озгарувына, ял алувына эс бериледи. Айтпага, оьткен йылларда Сулак каньонда, Дербенттеги Нарын-кала беркитпесинде болып келдилер. Байрамларда тийисли тыншаювга шыккан эсли окытувшыларымызды да мутпаймыз, оларга сый-оьрмет этемиз.
Белгилеп озайым, мектебтинъ куьндегилик яшавында етекшимиз Емисхан Дуьйсенбиевна Акимова ман ортак тил тавып, биргелесте ислеймиз. Бу баьри зат мектеб исин ашыктан-ашык этип коьрсетеди, – деп боьлиседи мени мен Зухра Аджиева. Уьйкен сый-оьрметлик пен эсине туьсирди ол окытувшылардынъ район профсоюз организациясынынъ алдынгы етекшиси Зарета Зекерьяевна Аюповады: «Сосы ямагат исин уьстинликли юритуьвге коьп себеплигин тийгисткен Зарета Зекерьяевна (яткан ери ярык болсын). Ол оьзининъ ис сулыбы ман, пайдалы маслагатлары ман кенъ аьлинде боьлисетаган эди. Буьгуьнлерде онынъ берген маслагатлары бизим аьрекет этуьвимизде уьйкен ярдам болады, – деп тамамлады хабарын З.Аджиева.
Алибий Капланов.
(Эдиге авылы).
Суьвретте: З.Аджиева