Сапиет Бекмурза кызы Межитова (суьвретте), Орта-Тоьбе авылынынъ орта мектебининъ етекшиси, тарих сабагыннан окытувшы, Россия Федерациясынынъ ортак билимлендируьвининъ сыйлы куллыкшысы:
– Бу куьнлерде Россия Федерациясы ман Донецк эм Луганск Республикаларынынъ бойсынмаслыгы беркитилди эм бизим элимиздинъ ваькиллери Украина еринде специальли операцияды басламага оьз карарын алды да, баслады.

Россия Федерациясынынъ Президенти Владимир Путин кеспили аьскершилердинъ куьшлери мен, Россия элин оьзине бойсынтпага суьйгенлерди токтатпага амаллы болды. Соны бу куьнлерде эм аьли этпесе, бир уьш-доьрт йыллардан айлак кеш болаягын коьбиси биледи. Эгер сол шаклы заманга дейим созылган болса, тек кеспили аьскершилердинъ куьшлери мен енъмеге кыйын болаяк эди, савлай мыратларымызды, биревлерге – кесек заманга, баскаларга дайымларга мутпага туьседи. Аьли аьр биримиз оьз-оьзине сорав бермеге тийисли, бизге не керек? Армаганда Украина еринде неонационализм режимин яклаймызба яде болса, 8 йыл болаятырган урысларды токтатып, тынышлыкты туьзип, суьйикли республикамызды саклаймызба?
Мен Россия Федерациясынынъ Президенти Владимир Владимирович Путинге эм Оькиметимизге бек сенемен. Россия Федерациясынынъ Коршалав министерствосынынъ билдируьвлерине коьре, Россия аьскершилери тек аьскер инфраструктурасына эм украин аьскершилерине карап урадылар эм олардынъ куьшлери мен ДНР эм ЛНР оларга шапкынлык этетаган явлардан босатылады. Россия Президенти билдиргенлей, Украина элине шапкынлык этуьв акында соьз де юритилмейди.
Бизим элимиздинъ етекшиси салатаган борышлар толтырылып, элимизде тынышлык эм эркинлик болаягына бек сенемиз. Балаларымыз тынышлыкта яшасын!