Маьселе_________________

Туьнегуьн, 16-ншы казан айында, оьткен «Ногайский район» МР Депутатлар йыйынынынъ 28-нши сессиясында катнаскан «Ногайский район» МР администрациясынынъ аькимбасы Мухтарбий Аджеков Суьйимбике мен байланыслы сорав акында оьз ойын билдирген.

Онынъ айтувы ман, ызгы йылларда кардаш казах тарихшилери, аьлимлери бизим Ногай Ордамыздынъ коьп халкларга ортак болатаган тарихин оьзлерине багайлы кепте туьрлендируьви сав миллетимизди навасызландырады. Сол себептен, ногай тарихи мен байланыслы соравды алгасамай аьруьв ойласып, айырым илми-практикалык конференциясын уйгынламага, сога баьри белгили аьлимлерди, тарихшилерди, язувшыларды, поэтлерди, айтувлы маданият, саният аьрекетшилерин шакырып, кайсы тарих ногайдыкы, кайсы казахлардыкы яде баска миллетлердики экенин айырып, тийисли карар алмага керегин белгилеген. Бу айтылган ой ман баьри район депутатлары, етекшилер, сессияга шакыртылган ямагат аьрекетшилери макул болдылар.
(Ногайымыздынъ айтылган данъклы эм каьмбил кызы Суьйимбике акында газетадынъ бетлеринде окынъыз).