Уфа каласында Дагестан Республикасынынъ информация эм баспа министрининъ кесек заманга куллыгын юритуьвши Умаросман Гаджиев Башкортостан Республикасынынъ баспа эм коьлем информация амаллары бойынша агентствосынынъ етекшиси Максим Ульчев пен йолыгыскан.

Гаджиев кардаш республикасынынъ информационлык тармаклары, агентстводынъ информационлык аьрекети мен таныскан, дагестан коьлем информация амалларынынъ ис сулыбы ман боьлискен. Оьз кезуьви мен Ульчев Дагестан халкларынынъ тиллеринде баспаланатаган эм таралатаган контентлери (баьри информация, сайтка ерлестирилген материаллар), ДР информация эм баспа министерствосынынъ ис аьрекети мен кызыксынган.
Йолыгыста кардаш респуб- ликаларынынъ коьлем информация амалларынынъ биргелес аьрекетин кенъейтуьв, бизим эки регионлар эм элимиз бойынша юритилетаган проектлерди яшавга шыгарув, медиа шараларында катнасув соравлары да ойласылган.
Уфада солай ок Умаросман Гаджиевтинъ «Башинформ» информационлык агентствосынынъ бас редакторы Руслан Шарафутдинов пан йолыгысы болып оьткен. Бу агентство Башкортостан СМИ арасында алдышы деп саналады, орыс, английс эм башкир тиллеринде материаллар баспалав аьрекети мен каьр шегеди.
Гаджиев соны ман бирге агентстводынъ куллыгынынъ бас йолларына, информационлык технологияларына, социаллык тармакларында юритетаган аьрекетине маьне берген.
Йолыгыстынъ тамамында эки кардаш республикаларынынъ информация эм баспа етекшилери армаган катнасув, информация ман авысувды кенъейтуьв акында соьйлескенлер.
Суьвретте: У.Гаджиев М.Ульчев пен йолыгысув аьсеринде.