Бу йылдынъ казан айынынъ 9-ншы куьнинде Москва каласынынъ миллетлер уьйинде бас каламыздагы Ногай ямагатынынъ уйгынлавы ман РАН Россия тарих институты бойынша миллетлер ара катнаслары эм Россия тарихининъ орталыгынынъ етекшиси, тарих илмилерининъ докторы В.Трепавловтынъ «Ногай Ордадынъ тарихи» деген 3-нши монографиясынынъ презентациясы оьтти. Ш.Марджани атындагы илми эм маданият бойынша программалардынъ оьрленуьв эм демевлик этуьв бойынша фондынынъ вице-премьери М. Заргишиев йыйылганларды китаптинъ авторы, Россиядынъ белгили тарихшиси эм Евразиядынъ орта оьмирлерде яшав суьрген коьшпели халклары бойынша тергевшиси Вадим Винцерович Трепавлов пан таныстырды.В.Трепавлов – дуныялык аты ман аьлим, Россия аьлимлери арасында тувыл, уьйкен сыйды тарихшилер, этнографлар, Орта эм ортаклык Азиядынъ, Европа эм Америкадынъ эллерининъ коьшпели халклары бойынша тергевшилери арасында да казанган. Презентацияда Москва каласындагы музейининъ тамада илми куллыкшысы, тарих илмилерининъ кандидаты М.Моисеев, ИРИ РАН «Россия халклар ара катнасларда» деген орталыгында тамада илми куллыкшысы, тарих илмилерининъ кандидаты А.Виноградов, юрист илмилерининъ доценти А.Ялбулганов, тарих илмилерининъ кандидаты В.Терехов, ИРИ РАН илми аьрекетшиси, тарих илмилерининъ кандидаты Ж.Рахаев эм сондай баскалар ортакшылык эттилер. В.Трепавлов презентация катнасувшыларынынъ соравларына яваплады. Шарадынъ сонъында Москва каласындагы ногай ямагатынынъ етекшиси Р.Акказиев белгили аьлими В.Трепавловка ногай халкынынъ тарихине эс этип келгени уьшин, Россиядынъ тарих илмилерининъ оьрленуьвине эткен уьйкен косымы уьшин разылык соьзлерин айтты. Москва каласында яшайтаган ногайлар Аталыгымыздынъ тарихи бойынша билимлерин яйылдырувда эм уьйренуьвде илми тергевлерининъ оьрленуьви бойынша ымтылысларын дайым коьтергишлеп келетаганын билдирди. Солай болып, Ногай ямагатымыз «Квадрига» баспасында баспаланган В.Трепавловтынъ «Ногай Ордасынынъ тарихи», «Евразиядынъ шоьл империялары», «Орда самовольная» деген китаплерининъ баспаланувларында катнасып келген. Р.Акказиев белгили аьлимге «Ногай Ордадынъ тарихин уьйренуьвде эткен уьйкен илми косымы эм россия илмилерининъ онъайлыгындагы коьп йыллык етимисли иси уьшин уьйкен разылыгын билдирди. Презентациядынъ сонъында автограф алув сессиясы оьтти. Шарада Москва каласыннан кумык, каракалпак, крым татар, башкир, казах, татар миллетлерининъ ваькиллери ортакшылык эттилер.
Суьвретте: шарадан коьринис.
