«Энергетиклердинъ куллыгы акында биз тек уьйимизде ярык соьнгенде эскеремиз, ярык кайтып янганда мутамыз», – деген аталык юмористлерининъ бириси. Тек сол ярык соьнгеннен алып кайтадан уьйлеримизди эм орамларымызды ярыклатканша, энергетиклер кула шоьлде сувык еллер, явын-шашын яде шыркыган исси куьн астында куллык этедилер.
Сондай энергетиклер сырасында «Северный Кавказ» – Дагэнерго» ПАО Ногай район электротармакларынынъ бас инженери Каирбек Муталимов пан дежурный диспетчер Батирхан Эсенгельдиев те бар.
Каирбек Сейпулович 1989-ншы йылда Иваново каласындагы В.И.Ленин атындагы энергетикалык институтын окып кутарган. 1995-нши йылда Ногай РЭС-ине станция бойынша службадынъ устасы болып ислемеге келген. 2003-нши йылда штатлар кемитилгеннен себеп бу куллыктан таймага туьседи. 2005-нши йыл РЭС-те электроэнергияды транспортлав службасы ашылады эм ол коллективке кайтады. Соннан ол 2018-нши йылда Ногай РЭС-нде ведущий инженер ис орынына коьшириледи, 2021-нши йыл сентябрьде ол мунда бас инженер болып беркитилген. Онынъ етекшилиги мен Ногай район еринде 5 подстанцияларына карав бериледи. Каирбек – билимли эм яваплы ис устасы, Ногай РЭС-тинъ баьри алатлары, техника ягыннан канагатлав иси онынъ мойынында. Ол РЭС етекшисининъ техника ягыннан орынбасары болады.
Батирхан Эсенгельдиев 1983-нши йылда Орджоникидзе каласында Горский авыл хозяйство институтынынъ электрофикация факультетин окып биткен сонъ, Ногай РЭС-те ис йолын дежурный монтер куллыгыннан баслаган. Ол эндигиси 39 йыл узагында мунда таймастан намыслы кепте ис аьрекетин бардырады, коллективтинъ ветераны болып саналады. Соны ман бирге Батирхан оьзининъ бай ис сулыбы ман янъы келген яс кадрлар ман да боьлиседи, олардынъ насихатшысы болады.
– Оьткен йыл ызында белгиленген Энергетиклер куьни мен байланыста баьри ис йолдасларымыз, коллективимизди басшылаган яс етекшимиз Рамиль Муслимовтынъ акында да ийги соьзлер айтпай болмаймыз, – дейди Батирхан Эсенгельдиев. – Ол мунда келгенли хыйлы куллыклар этилинип туры. Айтпага, подстанциядынъ меканларына капиталлык ярастырув ислери этилинди, район ериндеги эскирген электролиниялар, курыклар, трансформаторлар янъыларына авыстырылады. Ол аз десенъиз, келеектеги йылларга да Ногай РЭС бойынша коьп куллыклар этилинмеге каралады.
М.Юнусов.
Суьвретте: К.Муталимов эм Б.Эсенгельдиев.
