Буьгуьнлерде ногай халкы талаплы, оьнерли увылларынынъ бириси Гамзат Аджигельдиевтинъ тувган куьнин белгилейди.
Гамзат – миллетимиздинъ занъыратып сарнаган кусларынынъ бириси. Онынъ бизим халкымызга калдырган асабалыгы бир уьйкен карзына болады. Аьр бир шыгармасында терен философиялык ойы да бар, коьплеген ятлавлары йырларга айланып, несилден-несилге коьшип йырланып келеди.
Янъыларда маданият орталыгында Ногай районынынъ савлай мектеблерининъ окувшылары катнасып, «Мен язаман, халкым йырлап юрсин деп» аталган йыр конкурсы озгарылды. Шарадынъ барысында окытувшылар, Гамзат Аджигельдиевтинъ туьрли йылларда язылган ятлавларына ногай композиторлары анъ салып, йырга айланган асарларын йырлап эситтирдилер.
Окытувшылардынъ йырлап болув оьнерлерине белгиди Гамзат Аджигельдиевтинъ иниси Залимхан Юсуп увылы Аджигельдиев, «Ногайский район» МР Билимлендируьв управлениесининъ етекшиси Алтын Агаспарова, онынъ ис йолдасы Медина Гапарова, билимлендируьв тармагынынъ профсоюз комитетининъ председатели Зарета Аюпова, «Ногайский район» МР Депутатлар йыйынынынъ председателининъ орынбасары Увылбике Шандавова, Сраждин Батыров атындагы мектебининъ окытувшысы Боранбике Коккезова эм Гамзат Аджигельдиевтинъ карындаслары Светлана Гапарова ман Асият Манкаева бердилер.
Йыр шарасын А-Х.Ш. Джанибеков атындагы мектебининъ окытувшыларынынъ йырлавыннан басланды эм Орта-Тоьбе авыл мектебининъ окытувшыларынынъ йырлавы ман тамамланды.
Шарадынъ барысында Гамзат Аджигельдиевтинъ «Куьз», «Бир заманда шешекей мен тенъ коьрип», «Алдымда турган юлдыз», «Эсинъде ме», «Сылув кыз», «Куслар», «Кара боьрк», «Меннен баска бар болса» деген йырлары йырландылар. Тынълаган аьдемге, окытувшылардынъ йырлаганлары бек ярады. Тири сес аьдемди кызыксындырады (биз коьптен бери фонограммасыз йырлаганды эситкен йок эдик), буьгуьн янъылыслар болса да, сонынъ да оьз етимислери бар эди.
Йыр шарасында биринши савгалы орынга Нариман авыл орта мектебининъ окытувшылары «Сылув кыз» йырын йырлап ти- йисли болдылар. Экинши орынга Орта-Тоьбе эм Калинин авылларынынъ орта мектеблерининъ окытувшылары тийисли этилиндилер, уьшинши орынды оьзлери ара А.Ш.Джанибеков, Кумлы эм Куьнбатар авылларынынъ окытувшылар коллективлери боьлдилер. Кадрия атындагы мектебининъ окытувшысы Ису Аджиманбетовна Валиевага, тынълавшыларга бек яраганы уьшин, савга да берилди.
Шаир акында оьз ойлары ман ис ветераны Фатима Кузеевна Оразбаева да боьлисти.
Кешликтинъ ызында Гамзат Аджигельдиевтинъ оьзининъ язган эм коьширген ятлавларынынъ бир кесегин онынъ иниси Залимхан яттан окып эситтирди. Элбетте, кайдай терен ойлар болыпты экен отызга да толмаган шаирде. Гамзат – уьйкен аьриптен шаир. Ол халкка оьмирде бир берилетаган аьдемлердинъ бириси. Тек заманында онынъ оьнерине тийисли баа берилгенге усамайды…
А буьгуьнги билимлендируьв тармагынынъ куллыкшылары озгарган шара – шаирдинъ яркын эстелигине.
Г.Сагиндикова.
Суьвретте: Нариман авыл орта мектебининъ окытувшылары.
