Уьстимиздеги йылдынъ канътар айынынъ 31-нши куьнинде ТЮРКСОЙ Халклар ара тюрк маданият организациясынынъ штаб-квартирасында белгили ногай суьвретшиси эм скульпторы Кошали Зарманбетовтынъ «Всадник» деген выставкасы озгарылды.
Выставкадынъ ашылувында ТЮРКСОЙ организациясынынъ бас секретари Дюсен Касеинов, Турцияда яшайтаган ногайлары кирген «Ногай Дернеги» деген туркия организациясынынъ агзалары эм, баска болып, Дагестаннынъ Ногай районынынъ ваькиллери ортакшылык эттилер. Ногай районынынъ администрациясы эм ТЮРКСОЙ организациясынынъ демевлиги мен уйгынланган выставкасынынъ ашылувыннан сонъ, ТЮРКСОЙ организациядынъ бас секретари Дюсен Касеинов оьз соьйлевинде тюрк тилли халклар ара кардашлыкты беркитуьвди, дуныялык оьлшеминде тюрк маданиятын яйылдырувды эм аьдет баалыкларын яс-явкага коьшируьвди куьшейтуьв бойынша организация болатаганы акында белгиледи. ТЮРКСОЙ ман уйгынланган шаралары тюрк маданиятынынъ, саниятынынъ эм адабиатынынъ эм олардынъ маданият баалыкларын оьрлендируьвине уьйкен косымын эткен атларды яйылдырувына каратылганы акында белгилей келип, Д.Касеинов булай деди: «Биз буьгуьн ТЮРКСОЙ ман уйгынланган коьплеген маданият эм яратувшылык проектлерининъ белсенли катнасувшысы болган белгили ногай суьвретши эм скульптор Кошали Зарманбетовтынъ «Золотой всадник» деп аталган выставкасын озгарамыз. 2022-нши йылдынъ канътар айынынъ 28-нши куьнинде Ялова провинциядынъ Чифтликкёй муниципалитет еринде белгили скульптор Зарманбетов пан этилген ногай шаири Кадрия Темирбулатовадынъ эстелигин аштык. Шыгып соьйлевиннен сонъ ТЮРКСОЙ-дынъ бас секретари Дюсен Касеинов Кошали Зарманбетовка 2020-ншы йылында Халклар ара тюрк маданиятынынъ организациясы ман казах маслагатшысы эм шаири Абай Кунанбаевтинъ 175 йыллык мерекесине озгарылувы ман байланыста Онынъ эстелигине каратылган ТЮРКСОЙ-дынъ медалин тапшырды.
Белгили ногай суьвретши эм скульптор оьз шыгармаларында тюрк халкларынынъ бай маданият баалыклары ман коьнъилленгенин эм онынъ кесегин оьз куллыкларында коьрсеткенин белгиледи. Солай болып, Кошали Зарманбетов оьз разылыгын ТЮРКСОЙ организацияга эм онынъ бас секретари Дюсен Касеиновка ногай халкынынъ маданиятын эм саниятын яйылдырувына айырым эс бергенине эм, солай болып, ол оьз шыгармалары да Халклар ара тюрк организация аркалы саниятты баалавшыларга ететаганы уьшин де разылыгын билдирди.
Шарадынъ сонъында Дагестан Республикасынынъ ат казанган маданият аьрекетшиси Бегали Куруптурсунов эм оьнерли ногай музыканты Эдиль Аджибаев белгили анъ шыгармаларыннан туьзилген концертин уйгынлап озгардылар.
ТЮРКСОЙ сайтынынъ билдируьвлериннен.
Суьвретте: шарадан коьринис.
