Янъыларда КЧР Оькиметинде Карашай-Шеркеш гуманитарлык тергев институтынынъ бас илми куллыкшысы, Карашай-Шеркеш патшалык университетининъ карашай эм ногай кафедрасынынъ профессоры Насипхан Хусиновна Суюновадынъ етекшилиги мен Махачкалада «Эпоха» баспасында «Кадрия» деп аталып уьш топлама китаби дуныя ярыгын коьрди. Ногай аьлимимиздинъ белгилеви мен, бу Кадриядынъ асабалыгынынъ толы баспасы болады. Китапти туьзуьвши уьйкен суьйиниши мен окувшылар ман боьлиседи эм китаптинъ шыгувында демевлик эткенлердинъ аьр бирисине уьйкен разылыгын билдиреди.

– Сол китап иштелигине кирген Кадрия Темирбулатовадынъ алдын бирев мен де баспаланмаган орыс эм ногай тиллеринде шыгармалары, Россия эм шет эллер халкларынынъ 20 тиллериннен артык коьшируьвлери, яратувшылыгы бойынша очерклери, яшавыннан эм яратувшылыгыннан документленген хроникасы, хатлары, багыславлары, суьвретлери биринши болып ногай халк адабиатын суьйген яс несилине пайдаланмага ийги амал болды.
Биринши разылык соьзлерин бир неше йыллар бойы бу ис уьстинде куллык эткен филолог аьлими Фания Кусегеновага эм солай болып катнасканы эм, бас деп, Кадриядынъ архивин биз оннан алганмыз, бизге оны сенгени уьшин София Темирбулатовага билдиремен. Бизге ярдамласканларга, сиз олардынъ атларын китаптинъ кирис соьзинде табарсыз, юрек разылыгымды айтаман. Аьлиги замандагы поэзияды туьрли тиллерде окымага суьетаганларга Кадриядынъ соьзин бизге эм баска коьп тиллеринде соьйлейтаган окувшыларына еткергени уьшин коьшируьвши шаирлерге разылыгымды айтаман. Солай болып, «Эпоха» баспасына эм айырым бизи мен бирге туьзгенлердинъ бириси Хадижат Кураховага, 3 йыл бойы ис юритилип, Р.А.Тхагасовтынъ етекшилиги астында бу учреждениединъ грифын алган КЧР Правительствосы бойынша Карашай-Шеркеш Гуманитарлык тергев институтынынъ етекшилевине, Россия илмилер Академиясы бойынша Дагестаннынъ федераллык тергев орталыгындагы тил, адабиат эм саният бойынша институты ман да оьз грифы берилгени уьшин уьйкен разылыкты А.Т.Акамовка да билдиремен.
Кадрия – бизим поэзиямыздынъ ярыгы, маданиятымыздынъ оьктеми болады. Бизим шыгармамыз Кадриядынъ эстелигин оьрметлев, онынъ ярык келбетине сый этуьв белгиси, яратувшылыгын оьрметлев болады, – деп оьзининъ суьйинишли хабары ман боьлиседи белгили ногай аьлими Насипхан Суюнова оьзининъ фейсбук социаллык тармагындагы бетинде.
Бу «Кадрия» деп аталган уьш топлама китаби ногай халкымыз, солай болып поэзияды суьювшилери уьшин янъы йылына коьптен саклаган савга болаягына соьз йок. Ол аьр бир окувшыдынъ колында шанъ баспай, китап уьндиригинде энъ окылатаган шыгармалардынъ бириси болып бааланаягына сенемиз.
Суьвретте: «Кадрия» китабининъ тыскы коьриниси.