Альберт Батыргазиевтинъ уьстинликлери акында биз ызгы заман коьп эситемиз. Онынъ етимислери оьзек те халкын суьйиндиреди эм оьктемситеди. Солай ок яс спортсменнинъ атын тек халкымыз тувыл, савлай элимиз келеекте озгарылаяк уллы ойынларына ювык мыратлар ман байланыстырадылар.

Янъыларда Москвадагы «Крылья Советов» белгили боксерлар аренасында оьткен абырайлы «Бокс кешеси» турниринде Россиядынъ кеспили боксеры, Россия миллет йыйылма командасынынъ агзасы, Россиядынъ халклар ара класс спорт устасы, 4 кайта Россиядынъ чемпионы, WBA Asia белбавынынъ иеси ногай яс Альберт Батыргазиев кеспили спортта 3-нши кере енъуьвши болды. Ол оьзининъ куьндеси Сибусисо Зингангеди 7-нши раундта нокаут пан енъди. Альберттинъ ЮАР-дан келген куьндеси куьшли эди, ол ногай яс Альберт пен «Крылья Советов» аренасында йолыгысканша 14 кере енъуьвши болган эм 3 кере куьндеслерине енъ берген.
Альберт Батыргазиев озган куьрес акында хабарлаганда, олимпийский бокска толысынша коьшуьвин де билдирди: «Меним куьндесим куьшли эди, биз савлай ойынды оьтпеге аьзирлендик, куьрес эртеректен тамамланар деп ойлап та карамадык. Мен бек суьйинемен оьз элиме аьли де бир енъуьвди аькелгениме. Увыт айдынъ 6-ншы куьнинде Приэльбрусьеде йыйылма командадынъ европейский олимпия квалификациясына аьзирленуьв басланаяк, – дейди Альберт Батыргазиев янъыларда озган куьрес акында.
Ногай яс келеекте Токиода озгарылаяк Олимпиада ойынларында катнаспага ниетленеди. Биз ога сол маьнели шараларда уьстинликлерди йораймыз эм ногайлар сырасында биринши Олимпиада чемпионы болар деп сенемиз.
Н.Кожаева.
Суьвретте: А.Батыргазиев.